Վիճակագրական տվյալներով` Հայաստանը սելեկտիվ աբորտների թվով աշխարհում երկրորդ տեղն է զբաղեցնում Չինաստանից հետո:
Այդ մասին այսօր Վանաձորում կայացած «Բավական» ֆիլմի ցուցադրության ժամանակ ասաց «Մեդիա կենտրոնի» խմբագիր Եվա Մարտիրոսյանը:
«Մեդիա կենտրոնն» այս ամառվանից նախաձեռնում է մարզային միջոցառումների շարք, եւ Վանաձորում Ադրինե Գրիգորյանի «Բավական» ֆիլմի ցուցադրությամբ կմեկնարկեն մեր մարզային միջոցառումները: Ֆիլմը Հայաստանում շատ ակտուալ մի խնդրի` սելեկտիվ աբորտների` երեխայի սեռով պայմանավորված հղիության արհեստական ընդհատման թեմայի վերաբերյալ է»,-լրագրողների հետ զրույցում տեղեկացրեց Եվա Մարտիրոսյանը` նկատելով, որ Հայաստանը սելեկտիվ աբորտների թվով Չինաստանից հետո աշխարհում երկրորդն է, ինչը, ըստ նրա, սարսափելի ցուցանիշ է:
Մարզերում ֆիլմի ցուցադրությունը նպատակ ունի հնարավորինս ավելի շատ մարդկանց տեղեկացնել խնդրի մասին, բարձրաձայնել, ահազանգել, որպեսզի ունեցած տվյալները փոքրիշատե փոփոխության ենթարկվեն:
Կարդացեք նաև
«Այս տարի արդեն այդ ազդեցությամբ Հայաստանը երրորդ տեղում էր, այս տարվա տվյալներով Ադրբեջանն է երկրորդ տեղում: Սակայն սա չի նշանակում, որ մենք անելիք չունենք»,-ասում է Եվա Մարտիրոսյանը:
Փորձագետները նկատում են, որ սեռով պայմանավորված հղիության ընդհատումները Հայաստանին կկանգնեցնեն լուրջ խնդիրների առաջ`գենոֆոնդի փոփոխությունից մինչեւ սերնդի շարունակության անհնարինություն:
«Եթե այսպես շարունակվի, ապա 20 տարի անց մայր չենք ունենա` սերունդ ունենալու համար, կամ էլ տղաները կմեկնեն արտերկիր` օտարազգի հարսնացուների հետեւից, եւ հարց է` այնտեղից կվերադառնան թե ոչ»,-ասում են նրանք:
Ինչպես փաստում են «Բավական» ֆիլմի հերոսների մեծ մասը` իրենք ազատվել են աղջիկ երեխաներից միայն այն պատճառով, որովհետեւ իրենք կամ ընտանիքի անդամները տղա երեխա են նախընտրել ունենալ, ավանդույթի համաձայն` տան կրակը վառ պահելու համար:
«Ոնց կլինի` տղա չունենամ, բա տանս ճրագը ով վառ պահի, աղջիկը մերը չէ, աղջիկը ուրիշի տան ծուխն է»,-ասում են նրանք:
«Մենք մոռանում ենք, որ յուրաքանչյուր պտուղ, որ որովայնում ձեւավորվում է, Աստծո շնորհն է, Աստծո կամքն է, պարգեւը: Այն մարդը, ով ակամայից գնում է պտղի հեռացմանը, իրեն զրկում է Աստծո օրհնությունից: Եթե աբորտների քանակով հաշվարկենք՝ ապա մեր շրջապատում որքան մարդասպաններ կան: Իսկ այնտեղ, որտեղ մարդասպանություն կա, Աստծո օրհնություն լինել չի կարող»,-իր խոսքում նշեց Գուգարաց թեմի առաջնորդ Բարձրաշնորհ Տեր Սեպուհ արք. Չուլջյանը:
Անդրադառնալով հատկապես սեռով պայմանավորված աբորտներին` վերջինս նշեց, որ անկախ նրանից, թե մարդ ինչ սեռի երեխա է աբորտ անում, նա չի դադարում մարդասպան լինելուց, եւ որ ընտանիքի ծուխը վառ պահելու երեւույթն էլ երեխայի սեռով չի պայմանավորվում:
«Եթե դու աբորտ ես անում տղա երեխայի, հիշիր, դու հայրասպան ես, դու ապագայի հորն ես սպանում, եթե աղջիկ երեխա է` մայրասպան ես: Այդպիսի բան չկա, որ օջախի կրակը աղջիկ կամ տղայով է պայմանավորվում, մարդով է պայմավորվում: Այսօր հայ ժողովուրդը հեռացել է Աստծուց իր տգիտությամբ, Իր հանցավոր գործունեությունը պայմանավորում է սուտ ժողովրդական մեկնաբանությամբ»,-նշեց Գուգարաց թեմի առաջնորդ Բարձրաշնորհ Տեր Սեպուհ արք. Չուլջյանը:
Անուշ ԲՈՒԼՂԱԴԱՐՅԱՆ
