ՌԴ հանրային պալատի անդամ Դենիս Դվորնիկովը «Անալիտիկա» լրատվականի հետ զրույցում իր աջակցությունն է հայտնել Ուկրաինայի խորհրդարանում ներկայացված Հայոց ցեղասպանության մասին օրինագծի ընդունմանը:
«Ես կարծում եմ, որ Սիրիայի սպանդի, Եգիպտոսում տեղի ունեցող սպանությունների, վանքերի և պատմական հուշարձանների ավերման պատճառը վայրագությունների հանդեպ մարդկային կարճ հիշողությունն է», – ասել է քաղաքագետը` նշելով, որ մարդու ուղեղն այնպես է գործում, որ ամեն վատ բան մոռացության է մատնում, – «Սակայն սարսափելի իրադարձությունները մոռացության մատնելը, բացի սոցիալական և հոգեբանական հարմարավետությունից, իր մեջ այդ իրադարձություները կրկնվելու վտանգ են պարունակում»:
«Հայոց ցեղասպանությունը պաշտոնապես դատապարտելը միայն պատմական հիշողությանը հարգանքի տուրք տալ չի նշանակում, այն պատմության վահան է, որը կարող է կանխարգելել սարսափելի իրադարձությունները աշխարհի տարբեր ծայրերում», – ասել է Դվորնիկովը:
Հայոց ցեղասպանության օրինագիծը Ռադա են ներկայացրել պատգամավորներ Վիլեն Շատվորյանն ու Արսեն Ավագովը, ինչի կապակցությամբ Դվորնիկովն ասել է. «Բավական հուսադրող է, որ նման նախագիծ են պատրաստել Ուկրաինայի երկու հակադիր կուսակցությունների ներկայացուցիչները»:
Կարդացեք նաև
Պատրաստեց Հովհաննես ԻՇԽԱՆՅԱՆԸ
