Հինգերորդ գումարման ԱԺ չորրորդ նստաշրջանի աշխատանքների սկզբում ՀԱԿ խմբակցության անդամ Նիկոլ Փաշինյանն իր մտահոգությունը հայտնեց օրերս Սյունիքի մարզում ԱԺ պատգամավոր Զարուհի Փոստանջյանի տեղաշարժը սահմանափակելու կապակցությամբ տեղի ունեցած միջադեպի առիթով։ «Ի՞նչ իրավունքով են ռուսական սահմանապահները պետական սահմանից տասնյակ կիլոմետր հեռու անցագրային կետ ստեղծել՝ առանց հայ իրավապահների իմացության»,- ԱԺ նախագահին հարցրեց Փաշինյանը։
Հովիկ Աբրահամյանը տեղեկացրեց, որ դեպքի հաջորդ օրն ինքը զրուցել է Զարուհի Փոստանջյանի հետ: Վերջինս ասել է, որ կհանդիպի ԱԺ նախագահի հետ Երևանում, բայց հանդիպումը չի ստացվել։ ԱԺ նախագահը նաև հայտնեց, թե ռուսական սահմանապահ զորքերի հրամանատարի կողմից փաստաթուղթ է ստացել, և այն ուսումնասիրելուց հետո գնահատական կտա։ «ՀՀ օրենքները բոլորի համար հավասար են, և եթե որևէ ոտնձգություն լինի ՀՀ քաղաքացու կամ ԱԺ պատգամավորի նկատմամբ, ապա համարժեք գնահատական կտրվի»,- ընդգծեց նա։
Նիկոլ Փաշինյանն էլ տեղեկացրեց, որ ինքը դիմել է ԱԱԾ պետ Գորիկ Հակոբյանին՝ պարզաբանում ստանալու այն մասին թե ի՞նչ իրավասության ներքո են գործել ռուսական սահմանապահները։ Պատգամավորը նաև հետաքրքրվեց, թե երբ է ՀՀ գլխավոր դատախազը հաղորդում ներկայացրել ԱԺ, և այս տարի խորհրդարանում նրան լսելու են, թե ոչ։ «Այդ հարցն ինձ էլ է հետաքրքրում։ Ես խոսել եմ ԱԺ պետաիրավական հարցերի հանձնաժողովի նախագահ Դավիթ Հարությունյանի հետ, և եկել ենք այն պայմանավորվածության, որ գլխավոր դատախազը տարին մեկ հաշվետվություն ներկայացնի ԱԺ-ում։ Իմ՝ ԱԺ նախագահ աշխատած տարիներին, այո, գլխավոր դատախազը հաշվետվություն չի ներկայացրել խորհրդարանում՝ ԱԺ կանոնակարգում առկա ոչ հստակության պատճառով»,- ասաց Հովիկ Աբրահամյանը։
Փաշինյանը նաև պահանջեց անհապաղ ազատ արձակել քաղբանտարկյալ Տիգրան Առաքելյանին։ Հովիկ Աբրահամյանն ի պատասխան ասաց․«Պարոն Փաշինյան, ձեզ մի վերագրեք գլխավոր դատախազի պարտականությունները։ Ինձ մոտ տպավորություն է, որ Դուք խոսում եք խոսելու համար»։
Կարդացեք նաև
Ի դեպ, քառօրյայի հենց սկզբի քվեարկությունների ժամանակ, խորհրդարանական մեծամասնությունը դեմ քվեարկեց Հրանտ Բագրատյանի ներկայացրած «Նվազագույն աշխատավարձի մասին» ՀՀ օրենքում փոփոխություններ և լրացումներ կատարելու մասին և «Կուտակային կենսաթոշակների մասին» ՀՀ օրենքում փոփոխություններ և լրացումներ կատարելու մասին օրինագծերի՝ ԱԺ նիստերի օրակարգ ընդգրկվելուն։
Նելլի ԳՐԻԳՈՐՅԱՆ
Տեսանյութը՝ a1plusnews-ի
Պարոն Աբրահամյան ի տա
րբերություն շատ պատգամավորների Նիկոլը խոսում միայն ըստ էության: