Երեկ Գյումրիում համառ լուրեր էին տարածվել այն մասին, որ Գյումրու նախկին քաղաքապետ Վարդան Ղուկասյանի մոտ ընկերոջը` կալանավորված Հովհաննես Գրքիկյանին համաներել են` նրանից պահանջելով վերականգնել Գյումրուն պատճառած 80 միլիոն դրամի վնասը:
Հիշեցնենք, որ պարոն Գրքիկյանը Գյումրու քաղաքապետարանի նախկին առանցքային պաշտոնյաներից մեկն էր, երկար տարիներ զբաղեցնում էր բնակկոմունալ և շրջակա միջավայրի պահպանության բաժնի պետի պաշտոնը և վերջերս կալանավորվեց ՀՀ Քրեական օրենսգրքի 179 հոդվածի հատկանիշներով , այն է`«յուրացնելը կամ վատնելը՝ ուրիշի գույքի հափշտակությունը զգալի չափերով»:
Տվյալ պարագայում Հովհաննես Գրքիկյանը մեղադրվում է այն բանի համար, որ երկու անգամ 40 միլիոն դրամ է հատկացրել Վարդան Ղուկասյանի որդի Սպարտակին պատկանող` «Գյումրեցի ընկերներ» կազմակերպությանը, որը իր հերթին ոչինչ չի արել քաղաքի ասֆալտապատման համար:
Այս գործով 100 կասկածյալի անուն կա ՀՔԾ-ի ցուցակում, «Գյումրեցի ընկերներ»-ից մի քանիսը փախուստի մեջ են: Որպես կասկածյալ հարցաքննվում է նաև Գյումրու նախկին փոխքաղաքապետ Գագիկ Մանուկյանը, ով ևս ստորագրել է այդ երկու փաստաթղթերի տակ: Եվ եթե վերջինիս չձերբակալեցին, այդ հարցում դերակատարություն ունեցավ Գյումրու նախկին քաղաքապետ Վարդան Ղուկասյանի խնդրանքը Գյումրի այցելած Սերժ Սարգսյանին:
Կարդացեք նաև
Նշենք, որ փաստաթղթերի տակ չկա ոչ Գյումրու քաղաքապետ Վարդան Ղուկասյանի ստորագրությունը, ոչ էլ նրա որդու` Սպարտակի, ով սակայն «Գյումրեցի ընկերներ»-ի հիմնադիրներից է:
Ինչևէ, մենք ՀՀ ոստիկանության լրատվության և հասարակայնության հետ կապերի վարչությունից ճշտեցինք, թե արդյոք պարոն Գրքիկյանը համաներվե՞լ է: Արմեն Մալխասյանը մեզ փոխանցեց, որ նա ազատության մեջ չէ, կալանավորված է, և նախաքննությունը շարունակվում է:
Ըստ իրավաբանների, համաներումը կիրառելի է Հովհաննես Գրքիկյանի նկատմամբ, այն տարածվում է Քրեական օրենսգրքի 179 հոդվածի վրա, սակայն կա մի նախապայման` եթե վերջինս վերականգնի, հատուցի պետությանը պատճառած վնասը: Ըստ մեր աղբյուրների, Վարդան Ղուկասյանը Սերժ Սարգսյանի հետ Գյումրու Ամենափրկիչ եկեղեցու մեջ ունեցած առանձնազրույցից հետո, նախագահին այս նույն հարցով մեկ անգամ ևս դիմել է:
Նույն աղբյուրների փոխանցմամբ, խոստումներ եղել են, հատկապես, որ հայտարարված համաներումը հնարավորություն տալիս է պարոն Գրքիկյանին կալանավայրից դուրս գալու, նախկին այս պաշտոնյայի ֆինանսական հնարավորություններն էլ լիարժեք ներում են 80 միլիոն դրամը վերականգնելու համար,սակայն վերևներից դեռ կախյալ ու լարված վիճակում են պահում նախկին քաղաքագլուխ Ղուկասյանին:
Նունե ԱՐԵՎՇԱՏՅԱՆ
” Սակայն վերևներից դեռ կախյալ ու լարված վիճակում են պահում նախկին քաղաքագլուխ Ղուկասյանին:՞ Չափազանց գրագետ նախադասություն է, մի հատ խմբագրեք, vor էս նախադասության խելքը գլուխը գա