Հայաստանը տարածաշրջանում առաջինն է, որ ստեղծել է «Մեդիագրագիտության» ձեռնարկ: «Ինտերնյուսը»՝ այսօր արդեն Մեդիա նախաձեռնությունների կենտրոնը, մեդիագրագիտության դպրոցական ծրագրի վրա աշխատել է շուրջ երկու տարի: Եվ հոկտեմբերի 18-ին կկայանա «Մեդիագրագիտություն» ձեռնարկի ու «Մեդիամարտ» խաղի շնորհանդեսը:
Ինչպես Aravot.am-ի հետ զրույցում նշեց նախագծի ղեկավար Լուսինե Գրիգորյանը. «Բարձր դասարանների համար նախատեսված «Մեդիագրագիտություն» դասընթացի մեջ մտնում է «Մեդիագրագիտություն» ձեռնարկը` էլեկտրոնային հավելվածով եւ խաղով: Ձեռնարկը երաշխավորվել է ՀՀ ԿԳ նախարարության կողմից` որպես ուսումնաօժանդակ նյութ դպրոցների համար: «Մայքրոսոֆթ» ինովացիոն կենտրոնը ապահովել է խաղի տեխնիկական աջակցությունը»:
Ի դեպ, ՅՈՒՆԵՍԿՕ-ն անչափ կարեւորում է մեդիագրագիտությունը դպրոցական հասակում, եւ նրա տպագրած «Media Education: A Kit for Teachers, Students, Parents and Professionals»-ն էլ հիմք է դարձել տարբեր երկրներում մեդիակրթության դասընթաց մշակելու համար: Ընդ որում, ի տարբերություն նախկին խորհրդային շատ երկրների, Ուկրաինայի ԿԳ նախարարության երաշխավորությամբ մեդիագրագիտություն առարկան փորձարկվում է հարյուր դպրոցում: Այժմ հայաստանյան դպրոցներն էլ կարող են մեդիագրագետ աշակերտներ ունենալ:
Հավելենք, որ դասընթացը փորձարկվել է ՀՀ դպրոցներում, վերապատրաստվել է 60 ուսուցիչ, եւս 40-ը կվերապատրաստվի հաջորդ շաբաթ:
Կարդացեք նաև
Եվա ՀԱԿՈԲՅԱՆ
Լուսանկարը՝ media.am-ի
