Պատգամավոր Խաչատուր Քոքոբելյանը այսօր կառավարության հետ հարցուպատասխանի ժամանակ հարց հնչեցրեց Եվրամիության հետ հարաբերությունների մասին, որին վարչապետը պատասխանեց. «ԵՄ հետ հարաբերությունները եւ Եվրասիական միության, Մաքսային միության հետ հարաբերությունները մենք միշտ էլ դիտարկել ենք որպես փոխլրացնող: Բայց մենք ասել ենք, որ գործընթացներն են փոխլրացնող, ոչ թե՝ փաստաթղթերը: Փաստաթղթերում, այո, կարող են լինել կետեր, որոնք իրար կհակասեն, եւ դա բնական է եւ ենթադրում է, որ բանակցությունների միջոցով կշտկենք»:
Նա հիշեցրեց, որ ներկայումս կա քաղաքական որոշում, որ մենք գնում ենք դեպի Մաքսային միություն եւ չենք կարող ընդունել որեւէ միջազգային փաստաթուղթ, որը կհակասի այդ գործընթացին: «Եթե շարժվենք ձեր տրամաբանությամբ, – դիմելով Խ.Քոքոբելյանին ասաց վարչապետը,-ապա մենք կունենանք միայն մեկ ռազմավարական գործընկեր, իսկ մենք նպատակ ունենք դիվերսիֆիկացնել մեր արտաքին հարաբերությունները եւ այդ առումով դա բխում է մեր պետության եւ մեր ժողովրդի շահերից: Մենք ինքներս ենք որոշել արտաքին քաղաքականության մեջ գերակայությունները, հիմնավորել ենք դա ինքներս, եւ մեր բոլոր գործընկերները շատ լավ հասկանում են առաջնահերթությունները եւ գործողությունների տրամաբանությունը, մենք բաց եւ հրապարակային ենք եղել եւ Եվրամիության եւ ԱՄՆ-ի եւ ՌԴ-ի հետ, եւ նրանց համար մեր արտաքին քաղաքականությունը հասկանալի է:
Մելանյա ԲԱՐՍԵՂՅԱՆ
