Արվեստանոցը, որը զբաղեցնում է փիլիսոփա, գեղանկարիչ Շոթա Խաչատրյանը, այժմ ստիպված է լքել, քանի որ այն վարձակալական հիմունքներով էր, իսկ այժմ տարածքի տերը` որոշ հանգամանքներից ելնելով պետք է այն օգտագործի սեփական կարիքների համար, բնակեցնելով այնտեղ հարազատներին:
Aravot.am-ի հետ զրույցում Շոթա Խաչատրյանն ասաց, որ տասը տարի էր ինքն այդ «տարածքում» ստեղծագործում էր, այժմ`պետք է լքել այն. «Տարածքի տերերը հոյակապ մարդիկ են, բայց պետք է տեղափոխվեն, իսկ ես խանգարում եմ, նրանք էլ` այլ տեղ չունեն: Ես չգիտեմ, ուր տեղափոխեմ իմ նկարները, գոնե տուն ունենայի: Ես չգիտեմ, թե այս հարցն ինչպես կարելի է լուծել»,- նեղսրտած ասաց արվեստագետը, որի ձեւակերպմամբ, ափսոս է իր տարիների աշխատանքը:
Հարցին` օգնության կանչով չեք փորձե՞լ դիմել օրինակ մշակույթի նախարարություն, որ ձեզ տարածք տրամադրեն, թեկուզ ժամանակավոր, Շոթա Խաչատրյանն ասաց. «Ասում են, երբ ջուր կեղտոտված է, անիմաստ է դրա շուրջ մտածել, թե ինչպես այն մաքրել: Չեմ ուզում գնալ այդ բազարների մեջ մտնել, որ հետո էլ իրար դեմ են դուրս գալիս… Կյանքում չեմ սիրել վերցնել, ես միշտ օգնել եմ մարդկանց: Ես չեմ կարողանում դիմել, ինչքան էլ, որ անհրաժեշտ է լինում, անհարմար եմ զգում:
Միայն կուզենայի, որ տեսնեին ու իմանային, թե ինչ արվեստ է այստեղ ու, որ սա միայն նկարչություն չէ»,- նշեց Շոթա Խաչատրյանը:
Կարդացեք նաև
Լուսանկարը` civilnet.am-ի
Եվա ՀԱԿՈԲՅԱՆ
