«Եթե կա մի ընկերություն, որն ունի պարտքեր՝ թող սնանկ ճանաչվի, ինչո՞ւ ես և դու պիտի վճարենք այդ պարտքերի համար»,-խոսելով Հայաստանի կուտակած գազի պարտքի մասին՝ այսպես արտահայտվեց Կենտրոնական բանկի (ԿԲ) նախկին նախագահ Բագրատ Ասատրյանը:
Նա փաստեց, եթե ՀՀ-ում սովորական քաղաքացին գազի պարտք ունենար, նրան մեկ ամիս հետո կոչնչացնեին, կվտարեին: Պարոն Ասատրյանը վրդովվեց. «Մենք նրանց եկամուտների համար ենք վճարում: Իսկ գույքի փոխանցումը հանցագործություն է, քանի որ ըստ օրենքի` դա ապապետականացմամբ է լինում»:
Պարոն Ասատրյանը գազի հետ կապված խնդիրը զավեշտալի է համարում ու նշում. «Սա քրեական հանցագործությունների շարքում է: Որևէ նորմալ երկրում այս խնդրով դատախազությունը պիտի զբաղվեր»:
Խոսելով կենսաթոշակային համակարգի բարեփոխումների մասին՝ ասաց, որ կենսաթոշակային բարեփոխումների կողմնակից է ու նշեց. «Մեր իշխանությունը նման է մեղվաբույծի, որը ոչ թե փեթակը խնամում է, անընդհատ քաշքշում է, ու մեղուները թափվել են գզգզում են և՛ իրենց, և՛ մեզ»:
Կարդացեք նաև
Պարոն Ասատրյանը նշեց, թե տարվա սկզբից ուզում է տեղեկատվություն ստանալ «ՀայՌուսգազարդի» կայքից` բաժնեմասերի վերաբերյալ, բայց չի կարողանում:
Տնտեսագետ Վարդան Բոստանջյանը հավելեց. «Հայաստանի ազգային անվտանգության ծառայությունից ավելի հեշտ է իմանալ մի բան, քան «ՀայՌուսգազարդից»:
Բագրատ Ասատրյանը կարծում է, որ գազի հարցի վերաբերյալ «մութ սենյակում հինգ հոգի` լավ տղերք նստել ու որոշում են կայացրել, որոնց դեմն առնել հնարավոր չէ»:
Վարդան Բոստանջյանի գնահատականը չուշացավ. «Սա հանցագործությունից էլ այն կողմ է, հնարավոր չէ, որ մեկը կարողանա սրա պատասխանը տալ»:
«Ժառանգություն» խմբակցության պատգամավոր Թևան Պողոսյանից հետաքրքրվեցինք`խնդիրը պե՞տք է դիտարկել հանցագործության ոլորտում: Նա չցանկացավ այս առումով մեկնաբանություններ անել և ասաց, որ իրենք իրենց դիրքորոշումն արտահայտել են ՀՀ կառավարության եւ ՌԴ կառավարության միջեւ «Հայռուսգազարդ» ՓԲԸ-ի բաժնետոմսերի առուվաճառքի եւ հետագա գործունեության պայմանների մասին` ԱԺ ոչ իշխանական խմբակցությունների հայտարարությամբ:
Տաթև ՀԱՐՈՒԹՅՈՒՆՅԱՆ
