shamshyan.com լրատվական կայքը տեղեկություն է հրապարակել այն մասին, որ Նոյեմբերյան քաղաքի 34-ամյա բնակիչ Արկադի Անանյանը դիմել է ոստիկանության Նոյեմբերյանի բաժին եւ հայտնել, որ հունվարի 15-ին սոցիալական ծառայության Նոյեմբերյանի տարածքային գործակալությունում տեղի ունեցած վիճաբանության ժամանակ գործակալության տնօրեն 64-ամյա Սամվել Բեգլարյանը հայհոյանքներ տալով՝ ծեծի է ենթարկել նրան: Կայքը հայտնել էր, որ Ա. Անանյանին հետաքննիչի կողմից տրվել է դատաբժշկի ուղեգիր, իսկ Ս. Բեգլարյանը ստորագրությամբ ազատ է արձակվել:
Նոյեմբերյանի սոցիալական ծառայություններ տրամադրող տարածքային մարմնի տնօրեն, Հայաստանի գրողների միության Տավուշի մարզային բաժանմունքի ղեկավար, Հայաստանի լրագրողների եւ թատերական գործիչների միությունների անդամ Սամվել Բեգլարյանը մեզ ներկայացրեց դեպքի մանրամասներն՝ ասելով. « Սոցիալական ծառայություն է, կարող են լինել վեճեր: Արկադի Անանյանը Ռուսաստանում է լինում, այստեղ չի աշխատում, ներս է մտել, հարցրել, այստեղ հրատապ միանվագ օգնություններ են ցուցաբերվում մարդկանց: Արկադիի մայրը հիվանդ է, հաշվի առնելով այդ հանգամանքը(չնայած իր եղբայրը աշխատում է , աշխատավարձ է ստանում), համենայն դեպս, մեկ –մեկ օգնում ենք: Երկու եռամսյակ, իրար հետեւից օգնել ենք: Եկել է, հարցրել, թե ինչո՞ւ իր մայրը օգնություն չի ստանում: Ասել եմ, որ տարեսկիզբ է, ես հանձնաժողովի նիստին չեմ մասնակցել, 73 դիմում է եղել, 45 տեղ, ուրեմն թողել են, որ հաջորդ անգամ օգնեն: Թե՝ ո՞նց թե, դիտավորյալ եք արել,վեր է կացել, ինձ քաշքշել: Զանգել եմ ոստիկանություն, այնտեղից եկել են, ոստիկանությունից եկած մարդուն ասել եմ՝ այս երիտասարդին տարեք եւ գործ էլ չսարքեք: Դե քաշքշոցի ժամանակ ճանկռեց աչքիս վերեւը: Դուրս եմ գցել սենյակից, ոստիկաններն էլ տարել են»:
Ս. Բեգլարյանին հարցրեցինք՝ այդ քաշքշուկի ժամանակ Արկադին վնասվածք ստացե՞լ է:
«Իմ սենյակում՝ ոչ: Ինքն անհավասարակշիռ տղա է, ես հետո իմացա, թե ով է, չէի հիշում, նա երկար ժամանակ Ռուսաստանում էր: Նա մի ժամանակ Նոյեմբերյանի մշակույթի տանը աշխատում էր որպես բեմի բանվոր, երբ ես այնտեղ ռեժիսոր էի: Նա մշակույթի տնօրենի հետ կոնֆլիկտներ էր ունենում, վիճում էր»:
Կարդացեք նաև
Սամվել Բեգլարյանին նաեւ հարցրեցինք՝ իր նկատմամբ խափանման միջոց է ընտրվե՞լ չհեռանալու մասին ստորագրությունը: Նա ի պատասխան միայն ծիծաղեց, խորհուրդ տվեց ոստիկանությունից ճշտել լուրի իսկությունը: Ոստիկանությունից ճշտեցինք, որ դեպքի կապակցությամբ նյութեր են նախապատրաստվում, Սամվել Բեգլարյանի կարգավիճակը որոշված չէ, նրա նկատմամբ խափանման միջոց չի կիրառվել:
Ոսկան ՍԱՐԳՍՅԱՆ
Մեղավոր չեն, պատճառը հայիզմի մեջ է: