Ուկրաինայի վարչապետ Միկոլա Ազարովը հրաժարականի դիմում է ներկայացրել, ասված է կառավարության մամուլի ծառայության հաղորդագրությունում: Փոխանցում է «Լիգա.Նովոստի» լրատվականը:
Ազարովն իր հայտարարության մեջ նշել է, որ երկրում ստեղծված իրավիճակը սպառնում է Ուկրաինայի տնտեսական և սոցիալական զարգացմանը.
«Բախումների ժամանակ կառավարությունն ամեն ինչ արել է, որպեսզի հակամարտությունը խաղաղ ճանապարհով լուծվի: Մենք արել ենք և անում ենք ամեն ինչ, որպեսզի արյունահեղություն, բռնություններ, քաղաքացիների իրավունքների խախտումներ չլինեն», – ասել է Ազարովը՝ ավելացնելով, որ իրավիճակի սրացումն ու վտանգը պահանջում են ավելի պատասխանատու քայլեր, – «հասարակական-քաղաքական փոխզիջման համար ևս մեկ հնարավորություն ստեղծելու նպատակով, հանուն հակամարտության խաղաղ կարգավորման, ես որոշում եմ կայացրել խնդրել Ուկրաինայի նախագահից ընդունել Ուկրաինայի վարչապետի պաշտոնից իմ հրաժարականը»:
Ազարովը նամակում նաև նշել, որ իր կառավարման տարիներին նա ամեն ինչ արել է, որ Ուկրաինան զարգանա որպես եվրոպական ժողովրդավարական երկիր:
Կարդացեք նաև
«Այսօր ավելի կարևոր է պահպանել Ուկրաինայի միասնականությունն ու ամբողջականությունը: Դա շատ ավելի կարևոր է, քան ինչ-որ մեկի անձնական ծրագրերն ու հավակնությունները: Այդ պատճառով էլ ես հրաժարական եմ տալիս», – եզրափակել է Ուկրաինայի 15-րդ վարչապետը, որը պաշտոնը ստանձնել էր 2010թ.:
Պատրաստեց Հովհաննես ԻՇԽԱՆՅԱՆԸ
