«Ինձ համար մեծ պատիվ է լինել Հայաստանում, որտեղ, ինչպես ես եմ նկատում, վերջին տարիներին ավելի շատ մարդիկ են գալիս: Կարծես թե նորից բացվել է այդ ճանապարհը»,- այսօր լրագրողների հետ հանդիպման ժամանակ այսպիսի տեսակետ արտահայտեց հայտնի դաշնակահարուհի Ելենա Բաշկիրովան, որի մենահամերգը կկայանա վաղը՝ փետրվարի 2-ին, Արամ Խաչատրյան համերգասրահում, «Երևանյան հեռանկարներ» 15-րդ միջազգային երաժշտական փառատոնի շրջանակներում: Ծրագրում ներառված են Լիստի, Չայկովսկու, Ալբենիսի, Ուստվոլսկայայի ստեղծագործությունները:
Դաշնակահարուհին, որը երեք տարի առաջ է եղել Հայաստանում, մշակութային և մասնավորապես երաժշտական կյանքի վերելք է նկատում մեր երկրում. «Երաժշտական կյանքն այստեղ ծաղկում է ու ծաղկում: Դա շատ ուրախալի է, որովհետև հիանալի երկիր է Հայաստանը, հիանալի մարդիկ են այստեղ ապրում, որոնք հետաքրքրված են լավ երաժշտությամբ, այդպիսի հասարակություն քիչ է լինում»,- ասում է Ե. Բաշկիրովան:
Նկատենք, որ 1998 թվականից Ե. Բաշկիրովան իր հիմնադրած Երուսաղեմի միջազգային կամերային երաժշտական փառատոնի գեղարվեստական ղեկավարն է: Իսկ փառատոնը տեղի է ունենում ամեն տարի սեպտեմբերին՝ միջազգային ճանաչում ունեցող երաժիշտների մասնակցությամբ:
Դաշնակահարուհին կարևորում է լավ երաժիշտների մասնակցությունը փառատոնին՝ անկախ նրանց ազգային պատկանելությունից. «Փառատոնին նաև հայ երաժիշտներ են մասնակցել: Հայաստանում շատ լավ երաժիշտներ կան, և ես կարծում եմ, որ հայկական երաժշտությունը համաշխարհային երաժշտարվեստի անբաժան մի մասն է»,- ասում է Ե. Բաշկիրովան:
Կարդացեք նաև
Նա չի բացառում, որ իրենք կարող են նաև Հայաստան գալ և հայ հանդիսատեսին ներկայացնել իրենց փառատոնը, քանի որ այն հաճախ է տարբեր երկրներում կազմակերպվում:
Իսկ ինչ վերաբերում է Երուսաղեմի միջազգային կամերային երաժշտական փառատոնի այս տարվա ծրագրին, փառատոնի հիմնադիրն ու գեղարվեստական ղեկավարն ասաց, որ այն նվիրված է լինելու Առաջին համաշխարհային պատերազմին, և որ ինքը մտադիր է ինչ-որ ձևով անդրադառնալու նաև 1915 թվականին. «Ցավալի է, բայց պատմությունը կրկնվելու հատկություն ունի, և մոռանալ այդ ամենը ոչ մի դեպքում չի կարելի»,- համոզված է դաշնակահարուհին:
Սիրանուշ ՀԱՅՐԱՊԵՏՅԱՆ
