«Ժառանգություն» կուսակցության փոխնախագահ Արմեն Մարտիրոսյանը հերքեց լուրերը, թե կուսակցության որոշ երիտասարդներ որոշել են հեռանալ կուսակցությունից :
«Միակը Դանիել Իոաննիսյանն է: Դա իր անհատական որոշում է եւ եթե գտնում է, որ իր համոզմունքները, պատկերացումները քաղաքական պայքարի մասին չի համապատասխանում կուսակցությանը, իր անձնական որոշումն է, ի՞նչ ասեմ: Ինչ վերաբերում է կուսակցության ուղեգծին, ապա Դանիելի` կուսակցություն մտնելուց հետո կուսակցության ծրագիրը արմատական փոփոխությունների չի ենթարկվել` ո’չ առաջնահերթությունների, ո’չ ուղեգծի, ո’չ էլ` սկզբունքների առումով»,- մեզ հետ զրույցում ասաց պարոն Մարտիրոսյանը:
Անդրադառնալով Դանիել Իոաննիսյանի մատնանշած հիասթափության պատճառներին` պարոն Մարտիրոսյանը ասաց. «Եթե իրեն դուր չի եկել ինչ-որ բաներ, ինքը դրա մասին արտահայտվել է, բացարձակ խնդիր չեմ տեսնում»:
Իսկ Դանիելի մատնանշած հիասթափության պատճառներից մեկին էլ, պարոն Մարտիրոսյանը առանձնահատուկ անդրադարձավ. «Հիմա Ուկրաինայում էլ` Մայդանում աղոթում են, իհարկե, դա որոշների դուրը կարող է չգալ, բայց դա նույնպես առկա է: Հետո աղոթելը մատի փաթաթան դարձնելը Վլադիմիր Գասպարյանի հետ էր աղոթում, երեւի թե Վլադիմիր Գասպարյանն էր Րաֆֆի Հովհաննիսյանի հետ աղոթում: Իսկ եթե ինքը չի տեսել Ցեղասպանության հուշարձանում այդ աղոթելու խորհուրդը , դա արդեն Դանիելի խնդիրն է: Ես իրեն հաջողություն եմ մաղթում իր հետագա հասարակական գործունեության ընթացքում, հույս ունեմ, որ իր ցանկացած պատկերացում կկարողանա կյանքի կոչել եւ խնդիր չեմ տեսնում, որ Դանիելը Իոաննիսյանը դուրս է եկել: Նա մի կուսակցության անդամ է, որն իր նման բազմահազար անդամներ ունի, բնականաբար, մեկ հոգու հրապարակային դուրս գալը որեւէ խնդիր չի առաջացնում»:
Կարդացեք նաև
Արփինե ՍԻՄՈՆՅԱՆ
