Վերջերս կապանցի մեղվապահ Արմեն Մարգարյանը Ֆրանսիայից լավ լուր է ստացել, որ Ֆրանսիա ուղարկված իր պատրաստած Մեղրի նմուշը էկոլոգիապես մաքուր է ճանաչվել, բարձրորակ եւ լիովին համապատասխանել է եվրոպական չափանիշներին: «Մեզ այդ լուրը շատ ուրախացրեց, քանի որ կասկածում էին, որ Կապանը շրջապատված է հանքերով, ծանր մետաղներով եւ մեղրի որակը դժվար թե էկոլոգիապես մաքուր լինի: Մենք մեղվի փեթակները հանքերից մոտ 30 կմ հեռավորության վրա ենք տեղափոխում, որտեղ կլիման շատ բարենպաստ է, բնությունը մաքուր ու մեղրի յուրահատուկ համը, առաջնակարգ լինելը պայմանավորված է մեր տարածաշրջանին հատուկ բուսական աշխարհով» , – նշեց Կապանի տարածաշրջանի «Մեղու» հ/կ նախագահ Արմեն Մարգարյանը:
Վերջինս հիշում է, որ դեռեւս Խորհրդային միության տարիներին միութենական մասշտաբով Կապանի մեղրը մի շարք անգամ արժանացել է պատվոգրերի, առաջին հորիզոնականների, ոսկի մեդալների եւ այլն:
Արմեն Մարգարյանի պատմելով՝ դեռեւս օգոստոս ամսին Հայաստանում ֆրանսիացիների կողմից կազմակերպած միջոցառման ժամանակ հանրապետությունից 300 մեղվապահ իր պատրաստած մեղրը ներկայացրել էր օտարերկրացիներին, սակայն համապատասխան ստուգման արդյունքում միայն 15 հոգու պատրաստած մեղրն է համապատասխանել միջազգային ստանդարտներին՝ սախարոզայի տոկոսայնությունը ցածր է եղել 6.5 տոկոսից, իսկ մյուսներինը՝ 7 տոկոսից բարձր:
Կարդացեք նաև
«Իմ եւ մյուս 14 հոգու մեղրի սախարոզայի տոկոսայնությունը 5 տոկոսից ցածր է եղել, այդ նմուշները վերցրեցին՝ ուղարկեցին Ֆրանսիա, որտեղ նորից ստուգեցին: Իմ, կապանցի Հախյան Յուրայի մեղրը եւ Տավուշի մարզից մեկ հոգու մեղրն առաջին տեղ զբաղեցրեց, սախարոզայի տոկոսայնությունը 2.5-3 տոկոս էր: Իրենք տեսան, որ բարձրակարգ մեղր է, միջազգային չափանիշներից մի բան էլ բարձր, պայմանավորվածություն էինք ձեռք բերում, որ հաջորդ տարի մոտ 20 տոննա մեղր արտադրենք ու ուղարկենք» ,-ասաց մեղվապահը:
Ֆրանսիացիները մտադիր էին նաեւ ներդրումներ անել Կապանում, մեղվափեթակներ ավելացնել, մեծ քանակի մեղր գնել ֆրանսիական շուկայի համար, որտեղ էլ հայկական մեղրը կվաճառվեր Ֆրանսիայի բնակչությանը: Սակայն նախնական պայմանավորվածությունները եւ արդեն մեկնարկած բանակցություններն օդում մնացին, երբ ՀՀ նախագահը սեպտեմբերի 3-ին հայտարարեց Մաքսային միություն մտնելու որոշման մասին:
Ինչպես հավաստիացրեց զրուցակիցս՝ սեպտեմբերից առայսօր այդպես էլ ոչ մի առաջընթաց չգրանցվեց: «Մաքսային միությանը միանալու հայտարարությունը կարծես թե սառը ցնցուղ լիներ: Մոտ 10 տարի է՝ մենք պայքարում ենք միջազգային շուկա դուրս գալու համար, որը վերջապես ստացվում էր, բայց այդ հայտարարությունից հետո գործը կանգնեց: Հիմա այդ մարդիկ սպասում են, թե ինչ փաստաթուղթ կստորագրվի, վստահությունը կորցրել են մեր ղեկավարության հանդեպ, ամեն անգամ տարբեր բաներ են ասում: Միեւնույն է՝ այստեղի մեղրը գտնելու են, չենք կորելու, ուղղակի ժամանակի անտեղի կորուստ է, դժվարացնում են ամեն ինչ…» , – նշեց հ/կ նախագահը:
Արմեն Մարգարյանը հավաստիացրեց, որ Կապանի տարածաշրջանում մեղվաբուծությունը զարգացնելու մեծ հնարավորություն կա եւ այն եկամտաբեր գործ է, մնում է մեղրի իրացման խնդիրները լուծվեն: Մեղվապահները մտադիր էին ֆրանսիացիներին բարձրակարգ մեղրը վաճառել նույն տեղական գներով՝ 7-8 եվրոյով, թեեւ Կապանի մեղրը Ֆրանսիայում շատ ավելի թանկ գներով վաճառքի պիտի հանվեր: «Այնտեղ մոտ 50-60 եվրո կարժենար մեր մեղրը, մեզանից այնտեղի գնով վերցնեն՝ շատ լավ է, մեղրի իրացման խնդիր չենք ունենա, մեղվաբույծներն էլ դեռ իրենց փեթակները կավելացնեն: Իսկ հիմա անորոշ վիճակում սպասում ենք…, մեր կառավարությունը մեզ ոչ մի բանով չի օգնում, դեռ մի բան էլ խանգարում ու վնաս է տալիս» – հավելեց Կապանի տարածաշրջանի «Մեղու» հ/կ նախագահ Արմեն Մարգարյանը եւ մեծ հույսով սպասում է լավ նորությունների:
Մերի ՍՈՂՈՄՈՆՅԱՆ
Բնապահպանները ասում են ամենաաղտոտված շրջանն է, Ֆրանսիացիները մեղրը գնահատել են գերազանց։ Չգիտեմ ով ինչպես, բայց ես սկսում եմ այլևս ոչ մի բանի չհավատալ։
Արմենին շատ լավ գիտեմ: Նա շատ ազնիվ ու ջանասեր մարդ է:
Կարծում եմ նա անպայման կունենա մեծ հաջողություններ: