Արդեն մարտ ամսվա սկզբին Եվրասիական տնտեսական հանձնաժողովի հետ Հայաստանը կսկսի բանակցություններ այն ապրանքների մաքսատուրքերի դրույքաչափերի շուրջ, որոնց համար նախատեսվում են բացառություններ: Այսօր այս մասին լրագրողների հետ հանդիպման ժամանակ ասաց էկոնոմիկայի փոխնախարար Գարեգին Մելքոնյանը, որը «Սակագնային կանոնակարգման» աշխատանքային խմբի եւ Առևտրի համաշխարհային կազմակերպության եւ 3-րդ երկրների միջեւ առեւտրային քաղաքականության հարցերով աշխատանքային խմբերի ղեկավարն է:
Պարոն Մելքոնյանի ներկայացմամբ` բանակցային ապրանքները 900-ից ավելի են, բանակցության ընթացքում հնարավոր է այս թիվը փոփոխվի: Այսինքն` մաքսատուրքերի դրույքաչափերի բացառությունների առումով որոշ ապրանքատեսակներ այդ ցուցակից հնարավոր է հանվեն:
Փոխնախարարի խոսքերով` ներկայումս քննարկումներ են գնում նաեւ 3-րդ երկրների հետ առեւտրային ռեժիմի եւ Առեւտրի համաշխարհային կազմակերպության (ԱՀԿ) հետ, եւ, ինչպես ասաց պարոն Մելքոնյանը, երբ, բանակցային պատկերը որոշակի լինի, մաքսատուրքերի դրույքաչափերի մասին կծանուցի նաեւ ԱՀԿ-ն:
Հարցին, թե ի վերջո մաքսատուրքերի փոփոխության արդյունքում Հայաստանում գնաճը որքան կլինի, էկոնոմիկայի նախարարը հայտարարել է 1,5%, սակայն տարբեր վերլուծություններով այլ թիվ է լինում, պարոն Մելքոնյանն ասաց. «Որոշակի ապրանքների մասով կա մաքսատուրքերի դրույքաչափերի տարբերություն, որոշ ապրանքների մասով, որոնք մենք համարում ենք զգայուն եւ ներմուծում ենք հիմնականում 3-րդ երկրներից, որպեսզի ապրանքների գների բարձրացում չլինի, ի սկզբանե ֆիքսել էինք, որ անհրաժեշտություն կա ունենալու բացառությունների ցանկ: Այսինքն` չկիրառվեն ՄՄ-ում գործող դրույքաչափերը, այլ կիրառվեն Հայաստանի ցածր դրույքաչափերը, որպեսզի չունենանք գների կտրուկ բարձրացում: Մաքսատուրքերի դրույքաչափերի ամբողջ համակարգը հիմնված է Ռուսաստանի գործող մաքսատուրքերի դրույքաչափերի փաթեթի վրա, որն իր հերթին որոշակի առնչություն ունի ԱՀԿ-ի հետ Ռուսաստանի պարտավորությունների հետ: Այսինքն` մինչեւ 2019-20 թվականները այդ դրույքաչափերը փուլային առումով իջեցվելու են»:
Կարդացեք նաև
Փոխնախարարի խոսքերով, կան ապրանքներ, որոնց մաքսատուրքերը ոչ միայն չպետք է բարձրացվեն, այլեւ իջեցվելու են, շատ դրույքաչափեր էլ, որոնք եթե 3-4 տարի չեն բարձրանալու, այդ ընթացքում իջնելու են եւ հավասարվեն Հայաստանում գործող մաքսատուրքերի դրույքաչափերին: Կան նաեւ ապրանքներ, որոնց մաքսատուրքերն իջեցնելու դեպքում էլ Հայաստանի համար մնալու են բարձր, բարձր են լինելու նույնիսկ ԱՀԿ մաքսատուրքերից:
«Իսկ թե գնաճը շատ կլինի, քիչ կլինի, վերջնական պատկերը միայն բանակցություններից հետո պարզ կլինի»,-ասաց փոխնախարարը:
Ինչ վերաբերում է էկոնոմիկայի նախարար Վահրամ Ավանեսյանի ասած` 1.5% գնաճին, ապա փոխնախարարն էլ վստահեցրեց` բանակցային ապրանքների նկատմամբ առանց բացառություններ էլ կիրառելու, վատագույն դեպքում գնաճը կլինի 1.4%:
Նախարարի հաշվարկած 1.5 %-ը գնաճի մասին, մանրամասն` տեսանյութում
Նելլի ԲԱԲԱՅԱՆ
