Aravot.am-ի հետ Հայաստանում կանանց բռնցքամարտի ներկայի եւ ապագայի մասին զրուցելիս, ֆեդերացիայի նախագահ Արթուր Գեւորգյանը հաջողության հասնելու բանալին համարեց տղաների հետ համատեղ մարզումները:
«Ինչպես արվում է ամբողջ աշխարհում, ես որոշում եմ կայացրել, որ մեր աղջիկների հավաքականը համատեղ մարզվի համապատասխան տարիքային խմբի տղաների հավաքականի հետ: Կանանց հավաքականի մարզիչները դժգոհ են: Սակայն երբ աղջիկներին բացատրեցի, որ առանց այդ էլ իրենք շատ քիչ են` ամեն քաշում մեկ-երկու հոգի, եւ մարզումային մրցակից որպես այդպիսին չունեն, նրանք դեմ չեղան:
Ամբողջ աշխարհում ընդունված է, որ տղաներն ու աղջիկները մարզվում են համատեղ: Բայց դա չի նշանակում, թե տղաները ռինգում ցուցադրում են իրենց ուժի առավելությունները: Նրանք խնդրին գիտակցաբար են մոտենում: Մեր տղաներն էլ պետք է աղջիկներին օգնեն մրցափորձ կուտակել եւ հաջողությունների հասնել: Վարպետությունը ձեռք է բերվում այդ համատեղ աշխատանքում:
Մարզչի համար տարբերություն չկա` տղաների՞ն է սովորեցնում, թե՞ աղջիկներին: Տեխնիկական բազան նույնն է, հարվածի ձեւն էլ, լարվածությունն էլ, դիմացկունությունն էլ: Տարբերությունը ծանրաբեռնվածությունն է, աղջիկների պաշտպանիչ սաղավարտները եւ մի քանի հատուկ պարագաներ:Կրկնում եմ. նրանք մարզվում են միասին, բայց տարբեր առաջադրանքներ են կատարում: Եվ որքան լավը լինի տղամարդ մարզումային մրցակիցը, այնքան արդյունքն ավելի կլինի:
Կարդացեք նաև
Երբ ես պրոֆեսիոնալ էի, ռինգում իմ կողքին պարապում էր կանանց պրոֆեսիոնալների աշխարհի չեմպիոնը: Նա խնդրում էր ինձ, որպեսզի հետը մեկ-երկու ռաունդ մենամարտեմ: Հասկանալի է, ես ամբողջ ուժով չէի հարվածում, բայց նա իմ ու, ընդհանրապես, տղամարդկանց հետ մարզվելով, օգուտներ էր քաղում: Ի դեպ, նա ու մյուսներն էլ նվեր չէին: Լավ էլ հարվածում էին ու տեխնիկա-տակտիկական պատրաստվածության բարձր աստիճան ցուցադրում:
Ամերիկայում, որտեղ բռնցքամարտն առաջատար մարզաձեւերից է եւ այդ երկիրն աշխարհում առաջատար դիրքեր է զբաղեցնում սիրողական եւ պրոֆեսիոնալ բռնցքամարտում, տղաների ու կանանց համատեղ մարզումները սովորական են, նույնիսկ` մոդայիկ: Մարզադահլիճներում պրոֆեսիոնալների կողքին մարզվում են հոլիվուդյան աստղերը, սովորական աղջիկներ: Ու մեկը մյուսին չի խանգարում: Հակառակը` օգնում է. պրոֆեսիոնալը չի շեղվում իր աշխատանքից, սիրողն էլ մարզվում է նրա կողքին ու շատ բաներ սովորում: Սա է արդյունավետ ճանապարհը», – ասաց Արթուր Գեւորգյանը:
Աշոտ ՀԱԿՈԲՅԱՆ
