«Շարունակենք նոր ոգով ու նորովի» խորագիրը կրող միջոցառումների շրջանակներում մարտի 1-ին Նարեկացի արվեստի միությունում կայացավ Հայաստանի կույրերի միավորման երաժշտական կոլեկտիվների պաշտոնական կայքէջի` www.kuyreri-ergchaxumb.am-ի շնորհանդեսը:
Այս առիթով զրուցեցինք Հայաստանի կույրերի երգչախմբի պրոդյուսեր Ստեփան Թորոյանի հետ: Նա ասաց, որ կայքն արդեն սովորական բան է դարձել մեր հասարակության համար, և զգալով այն ունենալու պահանջը՝ որոշեցին ստեղծել www.kuyreri-ergchaxumb.am կայքը: «Ովքեր ուզում են խմբի մասին տեղեկություններ իմանալ, տեսագրությունները դիտել, կարող են այցելել մեր կայք»,- ասաց պրոդյուսերը: Նա նշեց, որ կայքում առայժմ շատ ինֆորմացիա չկա, բայց այդքանով կարելի է խմբի մասին պատկերացում կազմել:
Խոսեց նաև կայքի բովանդակության մասին. «Կայքում կան մեր համերգներից 2-3 տեսանյութեր, ձայնագրություններ, ֆոտոշարքեր, մամուլից էջեր, խմբի հիմնադրի, գործունեության մասին որոշակի ինֆորմացիա»:
Պրոդյուսերն անդրադարձավ նաև կայքի մեկ այլ նպատակի: «Մարդիկ կան, որոնք պրոֆեսիոնալ երաժշտական կրթություն ունեն, բայց տեսողության հետ խնդիրներ ունեն: Այս կայքի միջոցով կարող են իմանալ, որ կա այսպիսի մի երգչախումբ»,- ասաց Ստեփան Թորոյանը:
Նշենք նաև, որ կայքն այցելելուն պես սկսվում է հնչել երգչախմբի կատարումը:
Կայքի շնորհանդեսի ֆոտոշարքն` այստեղ:
Վարդուհի ԲԱԼՅԱՆ