Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանն այսօր «Ֆորում» ակումբում խոսեց կրոնական որոշ կառույցներից, որոնք իր համոզմամբ, միասեռականություն են տարածում եւ հոգեորսությամբ զբաղվում: Նա հայտարարեց, որ այսօրվա դրությամբ որոշ կրոնական կառույցներ սկսել են քարոզել ազատ սեռական հարաբերություններ՝ այդպիսով փորձելով ներգրավել երիտասարդների:
«Օրինակ` Հայ Ավետարանչական ընկերակցությունն ու Ավետարանական եկեղեցին 2012-ին սեռական դաստիարակության դասեր էին տալիս իրեն ամառային ճամբարներում, որտեղ կային 13-25 տարեկաններ : Վերջերս էլ մորմոնների մի կայք հայտնվեց, որտեղ միասեռականություն են քարոզում, չնայած իրենք ասում են, թե դեմ են միասեռականությանը: Այդ կայքէջը ստեղծվել է Յուտայում, որն իրենց կենտրոնն է: Որոշ պոռնոկայքեր նույնպես գրանցված են Յուտայում»,- նշեց Ամարյանը:
Նրա ձեւակերպմամբ, մի շարք կրոնական կառույցները ակտիվորեն զբաղվում են հոգեորսությամբ: «Ասուլիսներին հաճախ է խոսվում նոր աղանդների մասին: Այսօր Հայաստանում գրանցված է 64 կրոնական կառույց, որոնցից 50-ը աղանդավորական է: Չգրանցված աղանդավորական կառույցների թիվն էլ հասնում է 200-250-ի… Ի տարբերություն այլոց, ես ամեն կառույցի մասին խոսելիս ունենում եմ հիմնավոր բազա, դասագրքեր, մեխանիզմներ… Բոլոր քրիստոնեական կառույցները աղանդ են համարում մորմոններին եւ հոգեգալստականներին»,- ասում է Քայքայիչ պաշտամունքներից տուժածների օգնության և վերականգնողական կենտրոնի ղեկավարը:
Նրա ասելով, տարբեր ուղղություններ միմյանց աղանդ են անվանում. «Ավետարանչական ընկերության դասագրքում խոսվում է Եհովայի վկաների ու մորմոնների մասին իբրեւ աղանդ»:
Կարդացեք նաև
«Մորմոնների մոտ անգամ բազմակնությունն է թույլատրված»,-հավելում է Ամարյանը:
Ասուլիսի ժամանակ Ալեքսանդր Ամարյանն անդրադարձավ նաեւ Քեսաբի դեպքերին, ասաց, որ դա միտումնավոր է սանձազերծվել Եվրոպական եւ Արեւմտյան կառույցների կողմից՝ ստվերելու ուկրաինական դեպքերը, եւ շեղելու համար ԶԼՄ-ների ուշադրությունից ԱՄՆ- Ռուսաստան հակամարտությունը:
Գոհար ՀԱԿՈԲՅԱՆ
