Այսօր Երեւանի քաղաքապետարանում հասարակական տրանսպորտի ուղեվարձի հարցը քննարկող հանձնաժողովի մի քանի անդամների, որոնք նաեւ «գծատերեր» են, մեկ բան էր հետաքրքրում` հանձնաժողովը ե՞րբ է ավարտելու աշխատանքները: «Դավիթ երթուղային տաքսի» ընկերության տնօրեն Հարություն Առաքելյանը հանձնաժողովի նախագահ Երեւանի փոխքաղաքապետ Վահե Նիկոյանին հորդորեց ի վերջո, հանձնաժողովի աշխատանքների ավարտի ժամանակացույց նշել եւ հրապարակել սակագնի վերջնական տարբերակը. «Մենք էլ կորոշենք` աշխատենք այդ տարբերակով, թե` ոչ: Ձեռք կտա կաշխատենք, չի տա` երթուղագծերից կհրաժարվենք»:
Հանձնաժողովի անդամ, «Փոխադրողների միության» նախագահ Հրանտ Եղիազարյանի խոսքերով, արդեն 5 երթուղի շահագործող ընկերություններ փակվել են, որոշներն էլ սնանկության գործընթաց են սկսել:
Այսօր քաղաքապետարանում հանձնաժողովի հերթական նիստում ներկայացվեց վերգետնյա տրանսպորտային միջոցների ուղեւորահոսքի ուսումնասիրության արդյունքները: Անցյալ տարվա դեկտեմբերի 2- 25-ը «Այ Փի Էս Սի» քաղաքական եւ սոցիոլոգիական խորհրդատվությունների ինստիտուտը հետազոտել է մայրաքաղաքի ուղեւորահոսքը: Համաձայն այդ հաշվարկների, միկրոավտոբուսի ուղեվարձը կազմել է 207 դրամ, դիզելով ավտոբուսինը՝ 252 դրամ, բնական գազով աշխատող ավտոբուսի ուղեվարձի սակագինը՝ 196 դրամ:
Կարդացեք նաև
Սակայն փոխքաղաքապետ Վահե Նիկոյանն ասաց, որ հանձնաժողովի անդամները դեռեւս իրենց դիտարկումները պետք է ներկայացնեն եւ ուսումնասիրության արդյունքում ստացված թվերը դեռեւս վերջնական տարբերակը չեն:
Հանձնաժողովի անդամներից մեկն, օրինակ, առաջարկեց, սակագնի ձեւավորման հարցում գովազդից ստացված եկամուտները նույնպես հաշվարկել: Այսինքն` այն երթուղիներում, որտեղ տնտեսվարողը միկրոավտոբուսի կամ ավտոբուսի վրա այս կամ այն ապրանքն է գովազդում, գովազդից ստացված եկամուտները նույնպես հաշվի առնել:
Այսպես. ըստ «Այ Փի Էս Սի» ընկերության մասնագետների ուսումնասիրության,
մեկ աշխատանքային օրվա ուղեւորահոսքը կազմում է 613 հազար 786 մարդ:
Դիտարկվել են օրվա ընթացքում երեք պիկ ժամեր` առավոտյան, կեսօրին եւ երեկոյան:
Շաբաթական ուղևորահոսքը կազմել է 3 միլիոն 823 հազար 91 մարդ, ամսական` 16 միլիոն ուղեւոր: Տարեկան ուղեւորահոսքը կազմում է 167,957, 518 մարդ:
Վարորդների վարքի վերաբերյալ հարցումներին էլ ուղեւորները հիմնականում դժգոհել են վարորդների` ընթացքի ժամանակ ծխելուց, հագուկապից, չսափրված լինելուց, միմյանց հետ մրցակցելով երթուղայինը վարելուց, ինչի արդյունքում գերազանցում են արագությունը եւ այլն: Ուղեւորահոսքը դիտարկող մասնագետները նաեւ պարզել են, որ
Երթուղայիններում վարորդների 42 տոկոսը,մեքենան վարելիս, խոսում է բջջային հեռախոսով: «Այ Փի Էս Սի»-ի մասնագետները նաեւ պարզել են, որ
որոշ երթուղիների վարորդներ խցանումներից խուսափելու կամ ուղեւորներ հավաքելու համար նախատեսված ուղեգծով չեն երթեւեկում:
Ըստ հաշվարկների, միկրոավտոբուս շահագործելու եւ պահպանելու մեկ ամսվա ծախսերը կազմում են 1, 045090 դրամ, դիզելով աշխատող ավտոբուսի ծախսը` 1,870,908 դրամ, իսկ բնական գազով շահագործվող ավտոբուսի շահագործման եւ պահպանման ծախսը կազմում է 1,454, 209 դրամ: Շահագործման պահպանման ծախսեր:
Լուսինե ԲՈՒԴԱՂՅԱՆ
