«Դեմ եմ» քաղաքացիական նախաձեռնության անդամ Դավիթ Խաժակյանի համոզմամբ, կենսաթոշակային պարտադիր կուտակային բարեփոխման տապալումն իր ազդեցությունն ունեցավ վարչապետ Տիգրան Սարգսյանի հրաժարականի որոշման վրա:
«Բայց թե ինչ հիմնական այլ գործոններ են ազդել, կիմանանք միայն, երբ տեսնենք շարունակությունը: Տեղի է ունենում մի գործընթաց, որը դեռ քաղաքացիներիս համար տեսանելի չէ: Եվ շատ դժվար է ասել, թե ինչու դա տեղի ունեցավ այս պահին՝ ՍԴ որոշումից հետո, արդյոք այդ որոշման հետ պայմանավորված էր, թե ի վերջո վարչապետը հասկացավ, որ մոտ տասը տարի մշակված օրենքը թերություններով էր… կարծում եմ, որ այն ինչ իրականում տեղի ունեցավ , կիմանանք միայն, երբ ի հայտ գա վարչապետի հավանական թեկնածուն, հավանական կառավարությունն իր նոր ծրագրով»,- ասաց Դավիթ Խաժակյանը` «Aravot.am»-ին:
Նրա խոսքով, հաջորդ կառավարությունը ջանք ու եռանդ չպետք է խնայի կուտակային կենսաթոշակային համակարգը կամավոր դարձնելու և այն հնարավորինս արդյունավետ աշխատեցնելու վրա:
Ակտիվիստը նաեւ ասաց, որ ապրիլի 12-ին իրենք իրենց հերթական ակցիան կանցկացնեն՝ քննարկելու եւ ի մի բերելու ՍԴ որոշումը. «Որ քաղաքացիների հետ հասկանանք՝ ինչ էր ենթադրում ՍԴ որոշումը եւ ինչ պետք է անենք: ՍԴ-ն հակասահմանադրական ճանաչեց, հայցը բավարարեց, թե ինչ նրբություններով դա արեց, տեսնում ենք ՍԴ մեկնաբանության մեջ: Բայց ասում եմ, որ պահումները չպետք է պահվեն համաձայն Սահմանադրական դատարանի որոշման վեցերորդ կետի եւ իրավունքի գերակայության սկզբունքի: Եվ այն ինչ պահվել է, պետք է վերադարձվի: Ակնկալում ենք նոր կառավարությունից հստակ դիրքորոշում, այլ բան, եթե լինի, կնշանակի որ ՍԴ որոշումն անտեսվում է»:
Կարդացեք նաև
Արփինե ՍԻՄՈՆՅԱՆ