Գլենդեյլում հայերը բողոքում են «USArmeniaTV»-ով մյուս ամիս սպասվող «Glendale Life» (Գլենդեյլի կյանքը) հաղորդման դեմ, որը պատմում է տեղի հայերի մասին, գրում է «Գլենդեյլ Նյուս Փրես» թերթը:
Հաղորդման դեմ առցանց ստորագրահավաք է սկսվել և Ֆեյսբուքում էջ է բացվել, որին արդեն միացել են մոտ 8600 օգտատերեր, իսկ ստորագրահավաքին մասնակցել է մոտ 2150 հոգի: Նրանք «ռեալիթի շոուն» անվանել են «նվաստացուցիչ հայերի համար», «ամոթալի» և «անճաշակ»: Հաղորդման գովազդային հոլովակից երևում է, որ այն անդրադառնալու է ակումբներում հայերի գիշերային կյանքին, ավտովթարներին, պլաստիկ վիրահատություններին և լողավազանային խնջույքներին:
«USArmeniaTV» հեռուստաընկերության տնօրեն Բագրատ Սարգսյանը բացատրել է, որ այս «ռեալիթի շոուն» չի տարբերվում մյուսներից և այն նույնպես նախատեսված է «սադրիչ և հետաքրքիր» լինելու համար:
«Բոլորն ունեն իրենց կարծիքն արտահայտելու իրավունքը», – ասում Սարգսյանը, – «Հուսանք, որ սա ընդամենը զգացական պոռթկում է, և ժամանակի ընթացքում մարդիկ կհասկանան ազատության սահմանները»:
Կարդացեք նաև
Հաղորդման քննադատների կարծիքով, «Glendale Life»-ը Հայոց ցեղասպանության զոհերի հիշատակի նկատմամբ անարգանք է և այն վատ լույս կսփռի Ամերիկայի հայ համայնքի վրա:
«Այս շոուն Հայոց ցեղասպանության ժամանակ զոհված 1,5 միլիոնից յուրաքանչյուր տղամարդու, կնոջ և երեխայի նկատմամբ զրպարտությունից և հիշատակը ոտնահարելուց բացի, այլ բան չի անի», – ասված է ստորագրահավաքի նկարագրությունում, – «Մենք ավելին արժենք, քան սա: Մենք չպետք է լինենք ծաղրի առարկա նրանց դրամական եկամուտի համար»:
Սարգսյանը ծայրահեղական է որակել այս կարծիքը՝ նշելով, որ մեկը մյուսի հետ որևէ կապ չունի:
Ֆեյսբուքում նաև ստեղծվել մեկ այլ էջ՝ ի պաշտպանություն հաղորդմանը, որն արդեն ունի մոտ 4300 անդամ:
Պատրաստեց Հովհաննես ԻՇԽԱՆՅԱՆԸ
