«Հետք»-ի լրագրող Գրիշա Բալասանյանի պատմելով, իրենք ԱԺ էթիկայի հանձնաժողով այնպիսի ապացույցներ էին ներկայացրել, որ հանձնաժողովին այլ բան չէր մնում, քան արձանագրել , որ ՀՀԿ-ական պատգամավոր Առաքել Մովսիսյանը (Շմայս) խախտել է էթիկայի կանոնները:
Հիշեցնենք, որ խոսքը գազային համաձայնագրերի վավերացման օրը Ազգային ժողովի նիստերի դահլիճում լրագրողները` Գրիշա Բալասանյանը, Աննա Եղիազարյանը, Սարգիս Խանդանյանն ու Հակոբ Կարապետյանը ցուցապաստառներով լուռ ակցիա էին կազմակերպել:
«Մեզ համար սպասելի էր՝ մեծամասնության ներկայացուցիչների կողմից ռեպլիկի կամ այլ կարգի անպատշաճ վերաբերմունքի ենք արժանանալու: Երբ դիմեցինք էթիկայի հանձնաժողով՝ ապացուցման բազան ներկայացրինք դիմումի հետ մեկտեղ, ներկայացրինք տեսանյութ, որտեղ երեւում է պատգամավորի պահվածքը: Այլ կարծիք ունենալ չէին կարող, որովհետեւ ամեն ինչ հստակ էր: Հանձնաժողովի գնահատողական դատողության վրա որեւէ հիմք չթողեցինք, հետեւաբար ինձ համար սպասելի էր, որ նման որոշում կընդունվի»,-Aravot.am-ին ասաց «Հետք»-ի լրագրողը:
Մեր հարցին՝ հանձնաժողովի որոշումից հետո իրենց քայլերի հաջորդականություն լինելո՞ւ է, ասաց, որ հանձնաժողով դիմելու նպատակը մեկն էր՝ վիճակագրական բազա ստեղծել, թե որ խմբակցության պատգամավորներն են ավելի շատ էթիկայի նորմեր խախտում. «Էթիկայի, բարձրաստիճան պաշտոնյաների հանձնաժողովը որեւէ սանկցիա ու լծակ չունի պատգամավորների նկատմամբ, կամ կհրապարակեն նիստերի դահլիճում որոշման մասին կամ կտեղադրեն կայքում: Մեր խնդիրը արձանագրելն էր՝ հարգելի ՀՀԿ խմբակցություն, ձեր պատգամավորները, 130 պատգամավորի մեջ, ամենաանվերահսկելին են: Քայլեր, հետեւություններ արեք, ու փորձեք վերահսկել ձեր պատգամավորներին, որ իրենց կոռեկտ պահեն»:
Կարդացեք նաև
Նրա խոսքով, պատգամավորը նրանցից մինչեւ հիմա ներողություն չի խնդրել: Գրիշա Բալասանյանի կարծիքով, դա էլ հիմք դարձավ, որ հանձնաժողովը ճանաչի խախտումը:
Արփինե ՍԻՄՈՆՅԱՆ
Լուսանկարը՝ Գագիկ Շամշյանի` shamshyan.com
