«Մենք եկել ենք այս քննարկմանը մեր միջազգային գործընկերներին` ԵԱՀԿ-ին, ԵՄ-ին և GTZ-ին հայտնելու մեր տեսակետը»,-հարցին` հունիսի 5-ին հայտարարեցին, թե չեն մասնակցելու սահմանադրական բարեփոխումների քննարկումներին, ինչո՞ւ են շարունակում մասնակցել նաև հունիսի 6-ին, այսպես պատասխանեց «Ժառանգություն» կուսակցության փոխնախագահ Արմեն Մարտիրոսյանը: Այնուհետև վստահեցրեց, որ չեն մասնակցում բովանդակային անմիջական հարցուպատասխանին:
Aravot.am-ը Արմեն Մարտիրոսյանին հիշեցրեց, որ այս առիթով ՀՀԿ-ական Հովհաննես Սահակյանը նշել էր, թե «մեր գործընկերները եկել են միջազգային կազմակերպությունների մոտ ներկա ստանալու»: Նա արձագանքեց. «Իմ ընկեր Հովհաննեսը շատ տարբեր բաներ կարող է ասել: Բայց միջազգային կազմակերպություններն իրենցն են, բազմամիլիոնանոց գրանտները, որ տալիս են, իրենց են տալիս, մեզ մի կոպեկ դեռ չեն տվել: Միայն իրենց կեղծված ընտրություններն են լեգիտիմացրել և ոչ թե մեր կեղծված ընտրությունները»:
Հարցին` եթե սահմանադրական բարեփոխումներին նվիրված բովանդակային քննարկումներ լինեն, կմասնակցե՞ն, պարոն Մարտիրոսյանը պատասխանեց. «Մենք մեր միջազգային գործընկերներին ասել ենք «Ժառանգության» մոտեցումները, կոնկրետ որևէ հարցուպատասխանի մենք չենք մասնակցել: Սահմանադրական բարեփոխումների շրջանակներում այլ քննարկումների չենք մասնակցի»:
Տաթև ՀԱՐՈՒԹՅՈՒՆՅԱՆ
Կարդացեք նաև
