Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանը շարունակում է աշխատանքները: Այսօրվա` հունիսի 26-ի լիագումար նիստում անցկացվում է «Ուկրաինական ճգնաժամի` քաղաքական և մարդասիրական հետևանքները» թեմայով քննարկում: ԵԽԽՎ պատվիրակները բավականին կոշտ ելույթներ են ունենում Ռուսաստանի հասցեին` Ռուսաստանին անվանում «ագրեսոր», որը «բռնակցել է» Ղրիմը Ռուսաստանին: Պատվիրակները նշում են, թե Ռուսաստանի նպատակն է «ոչնչացնել Ուկրաինան»:
Նշենք, որ քննարկման մեկնարկին ԵԽԽՎ նախագահ Անն Բրասյորը հույս հայտնեց, որ ԵԽԽՎ-ն և Ռուսաստանը մինչև 2015-ի հունվար իրենց հարաբերությունները կկարգավորեն, և ելք կգտնեն ստեղծված իրավիճակից դուրս գալու համար: Նշենք, որ 2015 թվականիհունվարին կհաստատվեն բոլոր ազգային պատվիրակությունների լիազորությունները: Անն Բրասյորը նաև նշեց, որ չնայած պատվիրակությունը զրկված է լիազորություններից, բայց ռուսական պատվիրակության անդամները կարող են ներկա գտնվել նիստերին:
Հիշեցնենք, որ ուկրաինական զարգացումների պատճառով ապրիլի 10-ին ԵԽԽՎ-ն Ռուսաստանի պատվիրակության անդամներին մեկ տարով զրկեց քվեարկելու իրավունքից:
Այսօրվա նիստում շարունակվեցին Ռուսաստանի հասցեին հնչող քննադատությունները և ի պաշտպանություն Ուկրաինայի ելույթները:
Կարդացեք նաև
ԵԽ գլխավոր քարտուղար Թորբյորն Յագլանդը Վեհաժողովին կոչ արեց հիշել հետևյալը. «Ուկրաինան ինքնիշխան պետություն է: Մենք ոչինչ չենք ուզում պարտադրել այդ երկրին, այլ ցանկանում ենք միայն օգնել, որպեսզի դուրս գան ճգնաժամային կացությունից: Սակայն ուզում եմ` բոլորս մեր մտքում ունենանք այն, որ այդ երկրի հարցերը լուծվում են ուկրաինական խորհրդարանում»:
Թորբյորն Յագլանդը վստահեցրեց, որ ԵԽԽՎ-ն կշարունակի մշտապես մոնիթորինգ իրականացնել Ուկրաինայում ազգային փոքրամասնությունների իրավունքների պաշտպանության և այլ հարցերի վերաբերյալ:
Տաթև ՀԱՐՈՒԹՅՈՒՆՅԱՆ
