«Ես չգիտեմ` ինչ ասել է ԵԱՀԿ, ուստի չեմ թափանցի այդ կառույցի մեջ, այլ կխոսեմ դիվանագետի` իմ դիրքերից»,-այսօր Բաստիլի գրավման օրը` Ֆրանսիայի Հանրապետության ազգային տոնին, հայ լրագրողների հետ հանդիպմանն այսպիսի կարծիք հայտնեց ՀՀ-ում Ֆրանսիայի արտակարգ և լիազոր դեսպան Անրի Ռենոն` պատասխանելով լրագրողի այն հարցին, թե ինչու շփման գծում տեղի ունեցող լարված իրավիճակի իրական մեղավոր կողմի անունը չի նշվում ԵԱՀԿ-ի կողմից:
Անրի Ռենոն զգուշացրեց, որ ինքը խոսելու է դիվանագիտության կանոններով, որոնք տարբերվում են լրագրողական կանոններից ու հայտնեց. «Դիվանագիտությունն ունի իր հստակ կանոնները: Դրան համապատասխան սահմանված են հատուկ խաղի կանոններ, որոնք ընդունված են բոլոր երկրների կողմից, որոնք մասնակցում են այդ խաղին, այդ թվում նաև ԵԱՀԿ-ն: Ես հասկանում եմ Ձեր հարցը, բայց դիվանագիտության որդեգրած կանոնները մամուլի կանոններ չեն»:
Մյուս հարցին` արդյոք Եվրամիությունը իր հետաքրքրությունը չի՞ կորցրել Հայաստանի նկատմամբ` հաշվի առնելով ՀՀ-ի ցանկությունը անդամակցել Մաքսային և Եվրասիական միություններին, դեսպանն այսպես պատասխանեց. «Հայաստանը մնում է Արևելյան գործընկերության անդամ երկիր: Եվ այս շրջանակներում գրանցվել են զգալի առաջընթացներ: Ինչ վերաբերում է ՀՀ-ի նկատմամբ հետաքրքրությանը, ապա այդ հետաքրքրությունն ավելի ֆորմալ իր արտահայտությունը գտավ անցյալ տարվա նոյեմբերին` Վիլնյուսում կայացած Արևելյան գործընկերության գագաթաժողովում Եվրամիություն-Հայաստան հռչակագրի ընդունման տեքստում: Չմոռանալով նոր համատեքստը` ՀՀ ցանկությունն անդամակցել Մաքսային միությանն ու Եվրասիական միությանը, հռչակագրի ընդունման կետերի համաձայն, Եվրամիություն-Հայաստան համագործակցությունը շարունակում է իր ուղին»:
ԼՂ հակամարտության լուծման վերաբերյալ և ԼՂՀ ճանաչման գործընթացին վերաբերող հարցերին ի պատասխան, պարոն դեսպանն ասաց. «Երևի թե այս պահին չեմ ընկնի նման մեկնաբանությունների գիրկը, քանի որ որքանով ես գիտեմ` ԼՂՀ-ն դեռևս ընդունված չէ և ոչ մի պետության կողմից, այդ թվում նաև ՄԱԿ-ը դեռ չի հայտարարել, որ ճանաչում է ԼՂ-ն որպես անկախ պետություն»: Դեսպանը ընդգծեց, որ «ԼՂ հակամարտության կարգավորման` խաղաղ, բանակցային ճանապարհով լուծումը այլընտրանք չունի»:
Ֆրանսիական լրատվամիջոցների տարածած այն տեղեկությունները, թե Ֆրանսիան զենք է վաճառում Արդբեջանին, Անրի Ռենոն ժխտեց ու հավելեց. «Դա չի համապատասխանում իրականությանը: Ֆրանսիայի` որպես ԵԱՀԿ Մինսկի խմբի համանախագահող երկիր լինելու պարագայում սա ինքնին արդեն պարզ իրողություն է և չէր էլ կարող հակառակը լինել, որ Ֆրանսիան` որպես հակամարտող երկրների առաքելություն ստանձնած երկիր, հանկարծ հակառակվեր կամ չհարգեր ու չպահպաներ այն բոլոր դրույթները, որոնք սահմանված են ՄԱԿ-ի և հենց նույն ԵԱՀԿ-ի կողմից և զենք կամ սպառազինություն վաճառեր այնպիսի երկրներին, որոնք գտնվում են հակամարտության մեջ»:
Կարդացեք նաև
Տաթև ՀԱՐՈՒԹՅՈՒՆՅԱՆ
