Շիրակի ոստիկանապետն ընդդեմ «Հրապարակ» օրաթերթի եւ ilur.am-ի գործով փաստաբան Արմեն Խաչատրյանն այսօր Վերաքննիչ քրեական դատարանում ներկայացրեց ԵԽ հանձնակատարների կողմից հաստատված այն դրույթները, որոնց դեպքում միայն դատարանը կարող է պարտավորեցնել լրատվամիջոցին բացահայտելու աղբյուրը:
«Հանցագործություն, որը ուղղված է ազգային անվտանգության դեմ, առնչվում է հասարակության քրեաիրավական կենսական շահին, սպառված են վարույթն իրականացնող մարմնի բոլոր հնարավորությունները»,- մեջբերեց դրույթները փաստաբանը:
Փաստաբան Արտակ Զեյնալյանն էլ կրկին պնդեց, որ այս պարագայում պատասխանատվություն է կրում ոչ թե լրատվամիջոցը կամ խմբագիրը, այլ լրագրողը:
Հիշեցնենք, որ Կենտրոն և Նորք Մարաշ վարչական շրջանների ընդհանուր իրավասության դատարանը որոշել էր լրատվամիջոցներին պարտավորեցնել բացահայտել տեղեկատվության աղբյուրը : Խոսքը վերաբերում է նյութին: Լրատվամիջոցներն այժմ Վերաքննիչում պահանջում են բեկանել այդ որոշումը:
Փաստաբան Լուսինե Հակոբյանն էլ, մեջբերել է ՄԻԵԴ-ի այն որոշումը, որն ամրագրում է, որ աղբյուրի բացահայտումը բացասաբար է անդրադառնում լրատվամիջոցի վրա: Նրա խոսքով, այս գործն առնչվում է ոստիկանության բարձրաստիճան պաշտոնյային, եւ հնարավոր են ճնշումներ տեղեկատվություն տրամադրած մարդու վրա:
Մեղադրող Պետրոսյանը խնդրեց ժամանակ փաստաբանների ներկայացրած նյութերին ծանոթանալու համար: Դատական հաջորդ նիստը նշանակվեց սեպտեմբերի 22-ին:
Արփինե ՍԻՄՈՆՅԱՆ
