Սահմանային միջադեպերի լարված շրջանում՝ 2014-ի հուլիսին, մի խումբ մտահոգ երիտասարդներ ստեղծեցին «Աջակցենք սահմանամերձ բնակավայրերին» նախաձեռնությունը, որը ձևավորման օրվանից սահմանամերձ համայնքներում իրականացրել է մշակութային մի շարք ծրագրեր՝ նպատակ ունենալով ինչ-որ չափով փակելու մշակութային կյանքի այն մեծ բացը, որ կա հատկապես սահմանամերձ բնակավայրերում:
«Հայրենիքի սահմանները պաշտպանողները, առաջին հերթին, սահմանին ապրող մարդիկ են, և մեր պարտքը այդ մարդկանց կյանքը բոլոր առումներով լիարժեք դարձնելն է,- այսօր լրագրողների հետ հանդիպման ժամանակ ասաց Հովհ. Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը, որի բնորոշմամբ՝ այս նախաձեռնությունը հայրենիքի պաշտպանությանն ուղղված կարևորագույն քայլ է, որին Տիկնիկային թատրոնը պատրաստ է աջակցել ամեն ինչով:
Դեկտեմբերի 20-21-ը նախաձեռնության անդամները պատրաստվում են ամանորյա տոնական ծրագրով այցելել սահմանամերձ Բաղանիս և Դովեղ գյուղեր՝ տեղի բնակիչներին, մասնավորապես երեխաներին տոն պարգևելու համար:
«Բնակիչների հետ հանդիպումների ընթացքում համոզվել ենք, որ նման միջոցառումների կարիք կա ամենուր, սակայն կարևորելով հատկապես սահմանամերձ համայնքների մշակութային կյանքի աշխուժացման անհրաժեշտությունը՝ առաջարկում ենք, որ նման միջոցառումները լինեն համակարգված, պարբերաբար և կրեն պետական հովանավորչություն: Այսինքն՝ մշակույթի նախարարության հովանու ներքո Հայաստանի տարբեր թատրոններին բյուջեից տրամադրվեն համապատասխան միջոցներ (ճանապարհածախս, օրապահիկ և այլն)՝ սահմանամերձ բնակավայրերում ներկայացումներ կազմակերպելու համար»,- ասում է նախաձեռնության անդամ Տիգրան Մարտիրոսյանը:
Կարդացեք նաև
Նախաձեռնության անդամներն այս առաջարկով այսօր նամակով դիմել են ՀՀ մշակույթի նախարար Հասմիկ Պողոսյանին։
Ըստ Ռուբեն Բաբայանի՝ մշակութային կյանքի ապակենտրոնացումն այսօր ընդունում է ողջ քաղաքակիրթ աշխարհը, և դա արվում է գիտակցաբար. «Իսկ մենք մեր ողջ մշակութային կյանքը կենտրոնացրել ենք Երևանում: Մշակույթը մեր երկրինն է, բոլորինս է, և նույն երկրի որևէ քաղաքացի չի կարող մեկ այլ քաղաքացու հանդեպ առավելություն ունենալ միայն այն պատճառով, որ ապրում է այս կամ այն բնակավայրում: Դա վտանգավոր միտում է. մենք դրանով սահմանում ենք «երկրորդ կարգի մարդ» հասկացությունը»,- ասում է պարոն Բաբայանը:
Սիրանուշ ՀԱՅՐԱՊԵՏՅԱՆ
