Ներկայումս Տավուշի մարզի քաղաքների խմելու ջրագծերի ներքին ցանցերը նորոգվում են: Տավուշի մարզկենտրոն Իջեւանում խմելու ջրագծի ցանցի հիմնանորոգման աշխատանքները կատարում է «Բաղրամյանշին» բաց բաժնետիրական ընկերությունը: Իջեւանի տարբեր հատվածներում փոսեր կան: Դրանք փորվել են հին ջրագծերը փոխելու նպատակով: Այդ փոսերից շատերը երկար ժամանակ չեն ծածկվում, բնակիչների համար վտանգ են ներկայացնում: Իջեւանցիները պատմեցին, որ դեկտեմբերի 5-ին մարզկենտրոնի Անկախության փողոցում, «Վեգաս» խանութի մոտ Մոսկվայից Իջեւան ժամանած մի կին ընկել է փոսը, վնասել ոտքը: Պատահական մարդիկ օգնության հասնելով՝ նրան դուրս են բերել փոսից: Իջեւանցիները հայտնեցին, որ դրանից հետո փոսը ծածկել են, իսկ կինը բուժում է ստանում տնային պայմաններում:
Իջեւանի քաղաքապետ Վարդան Ղալումյանը դժգոհ չէ «Բաղրամշինի» կատարած աշխատանքներից: Նրա խոսքերով՝ Իջեւանի սեփական տների թաղամասերում ջրագծերի նորոգման ընթացքում վնասված ճանապարհները վերականգնելու համար այդ ընկերությունը քաղաքապետարանին օգնում է շինարարական տեխնիկայով: Քաղաքապետի վկայությամբ ՝ նախատեսված էր, որ ջրագծերի վերանորոգման աշխատանքները պետք է ավարտվեին մինչեւ այս տարեվերջ, սակայն մինչեւ ամանոր նորոգումը չի ավարտվի, այն կշարունակվի նաեւ 2015թ.-ին: Վ. Ղալումյանի խոսքերով՝ ամռանը տեղացած անձրեւներն էին պատճառը, որ նորոգման գործընթացը ժամանակացույցից ետ է մնացել:
Զանգահարեցինք «Բաղրամշին» ԲԲԸ գրասենյակ: Ընկերության փոխտնօրեն Վարդան Վարդանյան ասաց, որ ընկերության տնօրենը ներկայումս արտասահմանում է : Վ. Վարդանյանին հարցրինք, թե ե՞րբ է նախատեսված ավարտել Իջեւանի ջրագծերի նորոգումը: Նա ասաց, որ դա պարզ չէ, դեռ որոշակի չէ: Նրան ասացինք` չէ՞ որ վերանորոգման աշխատանքների ծրագրի ավարտը պետք է հստակ լինի: Նա հայտնեց, որ իրենց ընկերության տնօրենը կարող է այդ հարցին պատասխանել, որ հեռախոսով իրենք նման հարցի չեն կարող պատասխանել, դրա համար հարկ է գրավոր, պաշտոնապես դիմել իրենց:
Ոսկան ՍԱՐԳՍՅԱՆ
