Եթե չլիներ մոսկվացի ճարտարապետ Անդրեյ Իվանովի տիպիկ ռուսական արտաքինը, կարելի է մտածել, թե զրուցում ես ռուսախոս հայի հետ. Երևանի մասին խոսելիս Անդրեյ Իվանովի աչքերը փայլում են: Հայաստանի նկատմամբ սերն էլ «ստիպել է» ճանապարհորդության սիրահար ճարտարապետին իր հերթական գիրքը Հայաստանի մասին գրել: «Ուերևան.էտյուդներ տեղի ոգու մասին» գրքում հեղինակի երևանյան սերն է՝ տառերի տեսքով: Aravot.am-ի հարցին, թե ինչպես ստեղծվեց գիրքը, Անդրեյ Իվանովը ժպտալով պատասխանում է՝ այդպես դասավորվեց կյանքը. «Ես եկա Երևան, և այն ինձ դուր եկավ: Հետո էլի եկա, հետո էլի, էլի…Մի խոսքով, ինչ-որ բաներ սկսեցին ինձ շատ հետաքրքրել ու ցանկացա դրանք ուսումնասիրել: Ես ինձ համար բացահայտեցի Կոնդը: Իրականում հետաքրքիր է, որ աշխարհի տարբեր քաղաքների հենց կենտրոնում այդպիսի ուշագրավ թաղամասեր կան: Ես մտածում էի՝ ինչպես է այդ ամենը կառուցված, ինչպես են այդտեղ ապրում մարդիկ: Երևանի մասին մի շարք հոդվածներից հետո, որոնք տպագրվել են Մոսկվայում, «Գոլոս Արմենիի»-ում, նկատեցի, որ դրանք բավական շատ են ու ի վերջո պետք է վերափոխվեն ու այ տեսք ստանան: Հավաքեցի դրանք ու գիրք դարձրի»:
«Ուերևան»-ի հեղինակն առաջին անգամ Հայաստանում է եղել հեռավոր 1984-ին՝ ոչ երկար ժամանակով: Անդրեյ Իվանովն անկեղծանում է. հենց այն ժամանակից էլ մեր փոքրիկ քաղաքը գրքի հեղինակի «սիրտն է մտել»: Երկար ընդմիջումից հետո՝ 2011-ին, Անդրեյ Իվանովը նորից այցելեց Հայաստան և այցելությունները հաճախակի դարձան՝ հասնելով տարեկան չորսից հինգ անգամի. «Հայաստանում շատ հետաքրքիր բան կա: Ինձ ավելի շատ դուր են գալիս քաղաքները, դրանք գրավում են ինձ: Հայաստանում ավելի շատ գեղեցիկ վայրեր կան, քան հենց Երևանում՝ եկեղեցիներ, վանքեր…Բայց եթե ասեմ, որ ինձ ամենաշատն է դուր գալիս, ավելի անկեղծ կլինի:
Գիրքս միայն Հայաստանի գեղեցիկ վայրերի մասին չէ: Այն պատմում է այն ամենի մասին, ինչ հենց ես եմ հավանել, պարտադիր չէ, որ դրանք գեղեցիկ լինեն, բայց անպայման հետաքրքիր են՝ հաճախ նույնիսկ երևանցիներին անծանոթ: Օրինակ, Կարմիր կամուրջը: Շատերն այդ վայրի մասին նույնիսկ չեն լսել, բայց ես ինքս երեք անգամ մագլցել եմ այնտեղ՝ չնայած նրան, որ այդ հատվածը գրեթե անանցանելի է: Երևանում ամենաշատը Հին Նորքն եմ սիրում, որն իր կառուցվածքով մոտ է Կոնդին, սակայն Կոնդը ապականված, խաթարված վիճակում է: Հին Նորքում մնացել են հինավուրց, անաղարտ տներ, նույնիսկ առաջին տանտերերի ժառանգներն են ապրում այնտեղ: Այգիներ, մառաններ, տնական օղի, կարասներ, խաղողի վազեր…Մի խոսքով, ամեն ինչ շատ գեղեցիկ է: Հաճելի է,հոգեղեն է»:
Կարդացեք նաև
Սա Անդրեյ Իվանովի առաջին գիրքը չէ: Ճարտարապետը նման «սովորություն» ունի. ճամփորդությունները նրան հուշանվերների հետ գրքեր են բերում:
Սյունե ՍԵՎԱԴԱ
