Դեկտեմբերի 14-ին համայնքի ղեկավարի ընտրություններ կայացան Տավուշի մարզի Իջեւանի տարածաշրջանի Լուսահովիտ եւ Սարիգյուղ համայնքներում: Խաշթառակ գյուղի մերձակա Լուսահովիտում համայնքապետի թեկնածուն մեկն էր՝ գործող համայնքապետ, ՀՀԿ անդամ Արայիկ Սարհատյանը: Նրա նախկին «մրցակիցը»՝ 1980թ. ծնված, անկուսակցական Մարսել Մովսիսյանը նախկինում հանել էր իր թեկնածությունը: Սահմանամերձ Սարիգյուղում համայնքի ղեկավարի 3 թեկնածու կար՝ գործող համայնքապետ, ՀՀԿ անդամ Կոմիտաս Էլլարյանը, ՀՀԿ անդամ Գագիկ Մադաթյանը եւ անկուսակցական Սեյրան Սարիբեկյանը: Գագիկ Մադաթյանը Սարիգյուղի նախկին գյուղապետ Գերասիմ Մադաթյանի որդին է: Գագիկ Մադաթյանը 2011թ. համայնքի ղեկավարի ընտրություններում նույնպես առաջադրել էր իր թեկնածությունը: Նա այդ ժամանակ հանդես էր որպես անկուսակցական: Կոմիտաս Էլլարյանը Սարիգյուղ համայնքը ղեկավարում է 2004 թվականից:
Տավուշի մարզի թիվ 40 ընտրատարածքային ընտրական հանձնաժողովից(տեղակայման վայրը՝ ք. Նոյեմբերյան) իմացանք, որ Լուսահովիտի ցուցակային 286 ընտրողներից քվեարկությանը մասնակցել է 163, որից 159-ը կողմ է քվեարկել,4-ը ՝ դեմ: Սարիգյուղում գործող գյուղապետ Կոմիտաս էլլարյանը ստացել է 316, Սեյրան Սարիբեկյանը՝ 260, Գագիկ Մադաթյանը՝ 134 ձայն: Թիվ 40 ընտրատարածքային ընտրական հանձնաժողովից տեղեկացանք, որ ընտրությունների վերաբերյալ բողոքներ չկան: 2015թ. հունվարի 4-ին ավագանու ընտրություններ կկայանան Իջեւանի տարածաշրջանի Գետահովիտ համայնքում: Տարեմուտի ճոխ ճաշկերույթներից հետո հունվարի 4-ին գետահովտցիներին դժվար է լինելու ընտրություններ կատարել: 2015թ. մարտի 15-ին համայնքի ղեկավարի ընտրություններ կկայանան Իջեւանի տարածաշրջանի Ներքին Ծաղկավան, Ակնաղբյուր համայնքներում, ավագանու ընտրություններ՝ Իջեւան քաղաքում:
Ոսկան ՍԱՐԳՍՅԱՆ
