Այսօրվանից Հայաստանը պաշտոնապես միացավ Եվրասիական տնտեսական Միությանը (ԵՏՄ), որի ստեղծման մասին պայմանագիրն ուժի մեջ է մտել հունվարի 1-ին: ԵՏՄ-ին անդամակցում են չորս պետություններ՝ Ռուսաստանը, Բելառուսը, Ղազախստանը և Հայաստանը: Միության տարածքում ապահովվում է ապրանքների, ծառայությունների, կապիտալի և աշխատուժի ազատ տեղաշարժը:
Օրենքների համապատասխանեցման ու մաքսային կանոնների միասնականացման համար նախատեսված է 8-ամյա անցման շրջան: ԵՏՄ-ին միանալու կապակցությամբ Հայաստանը բանակցություններ կսկսի Առևտրի համաշխարհային կազմակերպության անդամների հետ՝ այդ կազմակերպության շրջանակներում ստանձնած պարտավորությունների փոփոխման շուրջ:
Երեկվանից գործարկվել է Եվրասիական տնտեսական միության պաշտոնական կայքը՝ www.eaeunion.org հասցեով, որը հասանելի է միության բոլոր անդամ-երկրների լեզուներով՝ հայերեն, բելառուսերեն, ղազախերեն եւ ռուսերեն, ինչպես նաեւ անգլերեն տարբերակով:
