Հավաքական անվտանգության պայմանագրի կազմակերպությունը (ՀԱՊԿ) բազմիցս նշել է իր դիրքորոշումը՝ կապված Լեռնային Ղարաբաղի հակամարտության հետ, հայտնել է ՀԱՊԿ գլխավոր քարտուղար Նիկոլայ Բորդյուժան հունվարի 30-ին մամուլի ասուլիսի ժամանակ:
Պատասխանելով լրագրողների հարցին, թե ինչո՞ւ ՀԱՊԿ-ը չի արձագանքում հայ-ադրբեջանական սահմանին հունվարին տեղի ունեցած դեպքերին՝ Բորդյուժան ասել է.
«Միայն 2014թ. ընթացքում ՀԱՊԿ-ը մի շարք հայտարարություններ է արել կապված Լեռնային Ղարաբաղի հակամարտության հետ, որոնցում հստակ արտահայտված է ՀԱՊԿ դիրքորոշումը այդ խնդրի առնչությամբ: Ես չեմ ասում, թե ինչպիսին է այն, քանի որ պարզ է», – ասել է Բորդյուժան՝ հարցադրելով, թե բացի դրանից ինչ այլ արձագանքի են սպասում, – «Ինձ դժվար է գնահատական տալ: Բայց եթե ձեզ թվում է, որ մենք պետք է ռազմական միջոցներով արձագանքենք, ապա դա կհակասի ՀԱՊԿ կանոնադրությանը, այն է՝ Ղարաբաղի հակամարտությունը լուծել բացառապես խաղաղ ճանապարհով՝ ԵԱՀԿ Մինսկի խմբի միջնորդությամբ»:
Պատրաստեց Հովհաննես ԻՇԽԱՆՅԱՆԸ
