Ազգային ժողովում այսօր ՊՆ փոխնախարար Արա Նազարյանը պատասխանեց լրագրողների հարցերին` ադրբեջանական լրատվամիջոցների կողմից տարածված տեսանյութի` մարտի 22-ին հակառակորդի կողմն անցած ՊԲ զինծառայողի մասին:
Հիշեցնենք, որ մարտի 22-ին՝ ժամը 13:50-ի սահմաններում, ՊԲ արևելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում՝ հակառակորդի կողմն է անցել ՊԲ զինծառայող, 1991թ. ծնված շարքային-պայմանագրային Անդրանիկ Արարատի Գրիգորյանը:
Զրույցը ներկայացնում ենք ամբողջությամբ եւ առանց մեկնաբանությունների:
– Պարոն Նազարյան, ի՞նչ եք կարծում, սահմանը լքած զինվորի մասին տարածած ադրբեջանական տեսանյութը ռեժիսուրայի՞ ժանրից է:
Կարդացեք նաև
– Դուք նենց հարց եք տալիս, որ ես պետք է առնվազն Ադրբեջանում լինեի, որ տեսնեի սարքե՞լ են, թե՝ չէ: Ասում եք` մանրամասն ներկայացրեք տեղի ունեցածը: Ի՞նչ է նշանակում մանրամասն ներկայացնել, մանրամասն պիտի տիրապետենք, չէ՞, որ ներկայացնենք: Ո՞նց մանրամասն տիրապետենք, նոր ուսումնասիրում ենք: Մենք գիտենք, որ անցել է հակառակորդի կողմը, պատճառներն ու նպաստող հանգամանքները ուսումնասիրվում են:
– Հոգեկան հիվանդ լինելու խոսակցությունների մասին ի՞նչ կասեք:
– Չեմ կարող ոչ մի բան ասել, այս պահին ուսումնասիրվում է: Դուք ուզում եք միանգամից պատասխան ստանաք երեկվա կատարված արարքի մասին: Ո՞նց կարա լինի տենց, հիմա պետք է ուսումնասիրվի չէ՞: Հիմա ես անպատասխանատու հայտարարություն անե՞մ: Դուք կանե՞ք նման բան:
– Իսկ ո՞ւմ է դիմել ՊՆ-ն, որպեսզի օգնեն զինվորին:
– Կարմիր խաչը միշտ համագործակցում է Պաշտպանության նախարարության հետ և բոլոր պատկան կառույցները իրազեկված են:
– Այս դեպքի պատասխանատվությունը ո՞ր կառույցի վրա է ընկնում:
– Պատասխանատվությունը կոնկրետ անհատի վրա է ընկնում:
– Իսկ ՊՆ-ի մեղավորությունը չկա՞, չէ՞ որ համապատասխան զգոնություն չի ցուցաբերվել:
– Ինչի՞ պաշտպանության նախարարության, ի՞նչ է նշանակում… դեռ պատճառները կուսումնասիրեն կտեսնենք ի՞նչն է եղել պատճառը, դուք միանգամից ուզում եք մեղավոր ման գաք, ըտենց ո՞նց կլինի: Ես չեմ հասկանում Ձեր մոտեցումը:
– Կարծիք կա, որ ինքնապաշտպանության առումով խնդիր կա, այսինքն սահմանին կանգնած չեն ավելի փորձառու անձինք:
– Կանգնած են փորձառու անձինք, բոլորն էլ փորձառու են, այնտեղ պատահական մարդիկ չկան: Դուք հիմա ուզում եք հակառակորդի սադրանքները վերագրեք մեր վրա՞: Իսկ դուք ինչո՞ւ չեք պնդում, որ Ադրբեջանը իր զոհերի քանակը ասի, փակել է՝ չի ասում: Մենք թափանցիկ ասում ենք, մեղադրանքներ եք ներկայացնում:
– Այս ամենը կարո՞ղ է տանել պատերազմի վերսկսման:
– Ես չեմ կարծում պատերազմ վերսկսվի: Դա իմ անձնական կարծիքն է, դա իրենց ձեռնտու չէ:
Գրի առավ`Նելլի ԳՐԻԳՈՐՅԱՆԸ
