«Այն, ինչ տեղի է ունենում հայ-ադրբեջանական շփման գծում, դա պատերազմ չէ, այլ զինադադարի կոպիտ խախտում Ադրբեջանի կողմից», – այսօր «Կովկաս» ինստիտուտում «Ռազմաքաղաքական իրավիճակը Ղարաբաղյան հակամարտության շուրջ: Գարնանային թեժացու՞մ» թեմայով հրավիրված քննարկմանը հայտարարեց գեներալ-լեյտենանտ, ՀՀ նախկին պաշտպանության նախարար Վաղարշակ Հարությունյանը:
Ըստ նրա՝ «Եթե խոսում ենք լայնամասշտաբ պատերազմի մասին, ապա գործոնները շատ-շատ են և հավանականությունը սկսելու ես համարում եմ շատ քիչ»:
Վաղարշակ Հարությունյանը գրեթե բացառում է, որ Ադրբեջանը կգնա լայնամասշտաբ պատերազմի ու հիմնավորում. «ՀՀ-ն ունի մարտունակ բանակ, և պատրաստ է կռվել: Դա լրացվում է հայ-ռուսական հարաբերություններով, այսինքն՝ ՀԱՊԿ անդամ է և Ռուսաստանի հետ ունի դաշնակցային հարաբերություններ»: Դառնալով սահմանային իրավիճակին՝ պարոն Հարությունյանն ասաց. «Չպետք է մոռանալ, որ Ադրբեջանն էլ իր խնդիրներն է լուծում»:
Հարցին՝ ՀԱՊԿ-ը Ադրբեջանի կողմից զինադադարի խախտման դեպքերին բավարար կերպով ինչու՞ չի արձագանքում, պարոն Հարությունյանը պատասխանեց. «ՀԱՊԿ-ը արձագանքել է: Ամեն ինչ հիմնվում է փաստաթղթերի վրա, ՀԱՊԿ-ը միջամտում է ագրեսիայի դեպքում և երբ դիմում է պետությունը: Հիմա Հայաստանը չի դիմել, ագրեսիա չի եղել»:
Կարդացեք նաև
Վաղարշակ Հարությունյանն այն տպավորությունը չունի, որ պաշտոնական Երևանի դիրքորոշումը կոշտացել է՝ ելնելով ՀՀ նախագահի հայտարարությունից՝ ՌԴ-ի զենի վաճառքի հարցով:
Կովկաս ինստիտուտ տնօրեն, քաղաքագետ Ալեքսանդր Իսկանդարյանը նշեց. «Հաճախ ղարաբաղյան հակամարտությունը անվանում են երկարատև: Սակայն այն երկարատև չէ, այլ բավական նոր, եթե դիտարկում ենք այլ հակամարտությունների համատեքստում»:
Կովկաս ինստիտուտի փոխտնօրեն, քաղաքական գիտությունների դոկտոր Սերգեյ Մինասյանն անդրադարձավ ԼՂ հակամարտության կարգավորմանը ու նշեց. «Հակամարտությունը չի հասնելու լայնամասշտաբ ռազմական գործողությունների: ՀՀ-ն, լինելով ՀԱՊԿ-ի անդամ, այս պահին ունի ավելի բարձր մակարդակի հարաբերություներ ՆԱՏՕ-ի հետ, նաև առանձին ՆԱՏՕ անդամ երկրների հետ, քան Ադրբեջանը»:
Տաթև ՀԱՐՈՒԹՅՈՒՆՅԱՆ
