Վերաքննիչ քրեական դատարանում ապրիլի 20-ին քննվում են Հիմնադիր խորհրդարանի հինգ անդամների գործով բողոքները: Փաստաբան Գեւորգ Դավթյանը լրագրողների հետ զրույցում ասաց, որ Գեւորգ Սաֆարյանին հանդիպել է միայն խափանման միջոց սահմանելու օրը:
Հարցին, թե իրականությանը համապատասխանո՞ւմ են այն լուրերը, թե Գեւորգ Սաֆարյանը բռնության է ենթարկվել, նա պատասխանեց, որ նման տեղեկության չի տիրապետում. «Կոնկրետ մամուլում տեղ գտած հրապարակումներն ու վերլուծություններն են, թե կոնկրետ ի՞նչ է եղել, մենք տեղյակ չենք: Պաշտպանական կողմը նույնպես պետք է այցելի, հետեւաբար՝ իրենց տեսակցության ժամին այդ հանգամանքները նույնպես պարզ կդարձնեն»:
Նա չբացառեց, որ Գեւորգ Սաֆարյանը խցից տեղափոխվելու համար է հացադուլ հայտարարել. «Կա նաեւ այդ վարկածը, հետեւաբար՝ ես հավանական եմ համարում, որ միգուցե ինչ-որ ճնշումներ եղել են, որ բերել են այդ վիճակին: Բայց չեմ կարող ասել, թե դա կախվա՞ծ է նրա քաղաքական հայացքներից, թե՞ այլ հանգամանքներից, որովհետեւ բանտախցերում կարող է ե՛ւ պայմաններից, ե՛ւ բանտախցի որոշ անդամների կողմից եւ անգամ դրսի ուժերի ներգործությամբ որոշակի ճնշումների ենթարկվել»:
Խոսակցություններ կան, որ համաներում չի հայտարարվում Հիմնադիր խորհրդարանի անդամների պատճառով, եւ այդ խոսակցությունների պատճառով բանտախցում թշնամանք է առաջացել Հիմնադիր խորհրդարանի նկատմամբ: Հարցին, թե արդյոք այդ խոսակցությունները համապատասխանո՞ւմ են իրականությանը, նա պատասխանեց. «Իսկապես չեմ ուզում փոխկապակցություն տեսնել, որովհետեւ մենք ավելի լավատես պետք է լինենք: Սակայն, այդ մտահոգությունը իսկապես որեւէ հիմքեր ունի: Սակայն, երեկվա դրությամբ մամուլի հրապարակումներ են լինում, որ համաներման հարցը հետաձգվում է մինչեւ մայիսի 1-ը: Բնականաբար, մենք կարող ենք մտածել նաեւ այդ ուղղությամբ, որ իսկապես կարող է կապ լինել, բայց հարյուր տոկոսով չենք կարող ասել»:
Կարդացեք նաև
Մանրամասները՝ շուտով տեսանյութում:
Ամի ՉԻՉԱԿՅԱՆ
