Այսօր մայիսի 5-ին, Հայաստանի ազգային պոլիտեխնիկական համալսարանում խոսելով ֆիզիկամաթեմատիկական գիտությունների դոկտոր, պրոֆեսոր, ՀՀ բարձրագույն կրթության եւ գիտության առաջին նախարար (1990-1991թթ.) Վիլիկ Հարությունյանի կերպարի մասին, ԿԳ նախարար Արմեն Աշոտյանը նրան որակեց որպես անվանի գիտնական եւ որպես բարձրագույն կրթության լավագույն կազմակերպիչ:
«Բոլորը, այդ թվում եւ ես, սովոր ենք պարբերաբար տրտնջալ եւ ասել, որ դժվար է աշխատել կրթության նախարար՝ երկում այս բարեփոխումների, ֆինանսական խնդիրների եւ այլ հոգսերի տակ: Երեւակայեք, թե ինչքա՜ն դժվար է եղել աշխատել բարձրագույն կրթության համար փաստացի պատասխանատու առաջին նախարար Վիլիկ Հարությունյանին՝ այն ժամանակվա բարձրագույն կրթության առաջին պատասխանատուին… պատերազմ, երկրաշարժ, կենտրոնի հետ կապերի խզում, նոր առաջադրանքներ, իսկ կրթական համակարգին անհրաժեշտ էին փոփոխություններ: Չկար Խորհրդային միությունը եւ նոր կրթության համակարգը պարտավոր է սպասարկել Հայաստանի Հանրապետության քաղաքացու շահերը: Նման մարդիկ մնում են պատմության մեջ եւ նախարարության պատմության մեջ՝ որպես Հայաստանի կրթության պատմության անկախ էջերի կարեւոր գործիչներ»,-ասաց Արմեն Աշոտյանը:
Ապա հավելեց, որ սովորաբար բուհերը դնում են այն մարդկանց կիսանդրիները, որոնք ավարտել են այդ բուհը, մինչդեռ Վիլիկ Հարությունյանը ավարտել է Երեւանի պետական համալսարանը. «Նրա կիսանդրու բացումը Պոլիտեխնիկական համալսարանում չի բացառում այլ նախաձեռնությունների իրականացումը: Սա եւս մեկ վկայություն է այն բանի, որ մարդու գործունեության գնահատականը տրվում է ոչ թե լոկալ տեսանկյունից, այլ համակարգային հարթության մեջ»:
Գոհար ՀԱԿՈԲՅԱՆ
Կարդացեք նաև
Լուսանկարը՝ արխիվային