Հուլիսի 16-ին Մայր Աթոռ Սուրբ Էջմիածնի Գևորգյան հոգևոր ճեմարանի հանդիսությունների դահլիճում, նախագահությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, տեղի ունեցավ «Ոսկե ծիրան» միջազգային ամենամյա կինոփառատոնի առիթով Հայաստանյայց Առաքելական Սուրբ Եկեղեցու սահմանած «Եղիցի լույս» մրցանակի հանձնման հանդիսավոր արարողությունը: Հայոց Եկեղեցու հաստատած պատվավոր մրցանակն այս տարի շնորհվեց աշխարհահռչակ ֆրանսիահայ կինոռեժիսոր Ռոբեր Գեդիգյանին:
Արարողությունն սկսվեց միասնական Տերունական աղոթքով, ապա «Ոսկե ծիրան» կինոփառատոնի մասնակիցներին ու հյուրերին ողջունեցին Մայր Աթոռի Թանգարանների և Արխիվի տնօրեն Արժանապատիվ Տ. Ասողիկ քահանա Կարապետյանը և Մայր Աթոռ Սուրբ Էջմիածնի հոգևոր-կրթական հաստատությունների վերատեսուչ, Գևորգյան հոգևոր ճեմարանի տեսուչ Գերաշնորհ Տ. Գևորգ եպիսկոպոս Սարոյանը:
Այնուհետև խոսք ասաց փառատոնի հիմնադիր տնօրեն Հարություն Խաչատրյանը` երախտագիտությամբ անդրադառնալով արվեստի նկատմամբ Վեհափառ Հայրապետի կողմից ցուցաբերվող ուշադրությանը, Մայր Աթոռ Սուրբ Էջմիածնի և «Ոսկե ծիրան» փառատոնի միջև ձևավորված սերտ համագործակցությանը, ապա ներկայացրեց տիար Ռոբեր Գեդիգյանի վաստակը:
Կարդացեք նաև
Մայր Աթոռի Եկեղեցական հայեցակարգային հարցերի գրասենյակի պատասխանատու Գերաշնորհ Տ. Բագրատ եպիսկոպոս Գալստանյանն ընթերցեց «Եղիցի լույս» մրցանակի հայրապետական վկայագիրը, որով հաստատվում է, որ «Ոսկե ծիրան» միջազգային կինոփառատոնի շրջանակներում հոգևոր, մշակութային և մարդասիրական արժեքների քարոզչության և համաշխարհային կինոարվեստում մեծ վաստակի համար Հայաստանյայց Առաքելական Սուրբ Եկեղեցու սահմանած «Եղիցի լույս» մրցանակը 2015 թ. շնորհվում է հայ ժողովրդի տաղանդաշատ զավակ, կինոռեժիսոր Ռոբեր Գեդիգյանին:
Հավարտ վկայագրի ընթերցման, Ամենայն Հայոց Հայրապետը կինոռեժիսոր Ռոբեր Գեդիգյանին հանձնեց «Եղիցի լույս» մրցանակը:
Այն ստանալուց հետո շնորհակալական խոսքով հանդես եկավ մրցանակակիրը` մասնավորապես նշելով. «Ես շատ շոյված և երջանիկ եմ այս մրցանակի համար, հատկապես այն բանի համար, որ մրցանակի անունը` լույսը, ուղղակիորեն կապված է կինոարվեստի հետ: Ֆիլմն ինձ համար լույս է մթության մեջ, որը կարող է օգնել մարդկանց դուրս գալու խավարից, փոքրից գնալու դեպի մեծը…: Այս է պատճառը, որ ես մշտապես այն համոզումն եմ ունեցել, որ կինոն ուղղակիորեն կապված է կրոնի հետ, և հավատացած եմ, որ փառատոնը, որի ժյուրիի նախագահն եմ այսօր, հարուստ է բազմաթիվ լույսերով»:
Հանդիսության ընթացքում Գարեգին Բ Վեհափառ Հայրապետի օրհնությամբ տեղի ունեցավ նաև պարգևաբաշխություն: Հայաստանյայց Առաքելական Սուրբ Եկեղեցու «Ս. Սահակ-Ս. Մեսրոպ» պատվո բարձր շքանշան հանձնվեց «Ոսկե ծիրան» միջազգային փառատոնի հիմնադիր տնօրեն Հարություն Խաչատրյանին` առ ի գնահատություն վերջինիս երկար տարիների վաստակյալ գործունեության:
«Էջ Միածինն ի Հօրէ» շարականի երգեցողության ներքո բերվեց Հայրապետական սրբատառ կոնդակը, որն ընթերցվեց Մայր Աթոռի Վարչատնտեսական բաժնի տնօրեն Գերաշնորհ Տ. Մուշեղ եպիսկոպոս Բաբայանի կողմից: Հայրապետական կոնդակում ասվում է. «…Սիրելի՛ պրն. Խաչատրյան, ճանաչում ենք Ձեզ անձնապես և քաջատեղյակ ենք Ձեր բեղմնավոր գործունեությանը: Դուք տասնյակ տարիներ նվիրյալ, ազգօգուտ աշխատանքով բարի ավանդ եք բերում հայ մշակույթի, մասնավորաբար, հայ կինոյի զարգացման գործին` ի սպաս դնելով աստվածպարգև Ձեր շնորհներն ու կարողությունները: Ձեր հեղինակած ֆիլմերը բազմիցս մրցանակների են արժանացել միջազգային հեղինակավոր փառատոններում` պատիվ բերելով շնորհաշատ հայորդուդ: Ձեր վաստակն այսօր արժանապես գնահատված է պետական ու հասարակական բազմաթիվ պարգևներով ու կոչումներով:
Այսօր առիթ ունենք անդրադառնալու «Ոսկե ծիրան» միջազգային կինոփառատոնի հիմնադրման գործում Ձեր գնահատարժան վաստակին: Գոհունակություն է Հայրապետիս համար, որ Ձեր ջանքերով «Ոսկե ծիրան»-ը դարձել է մեր երկրի մշակութային կյանքի կարևորագույն իրադարձություններից մեկը` արդյունավորապես ծառայելով հայ կինոարվեստի և հայ մշակույթի ճանաչմանը աշխարհում և հնարավորություն ընձեռելով արվեստասեր մեր ժողովրդի զավակներին հաղորդ դառնալ հայ և համաշխարհային կինոյի լավագույն ձեռքբերումներին»:
Կոնդակի ընթերցումից հետո Նորին Սրբությունը մեծարյալի կուրծքը զարդարեց Հայ Եկեղեցու պատվո բարձր շքանշանով: Այս առիթով երախտագիտության խոսք ասաց տիար Հ. Խաչատրյանը` հավաստիացնելով, որ պիտի շարունակի մնալ Մայր Աթոռի նվիրյալը և իր արվեստով ծառայել Հայոց Եկեղեցուն:
Հանդիսությունն ամփոփվեց Ամենայն Հայոց Կաթողիկոսի օրհնության խոսքով: Ողջունելով «Ոսկե ծիրան» միջազգային կինոփառատոնի` Մայր Աթոռ Սուրբ Էջմիածին ժամանած մասնակիցներին` Ամենայն Հայոց Հայրապետը նշեց. «Գոհունակությամբ ենք անդրադառնում, որ կինոփառատոնը կայացած ավանդույթ է դարձել հոգևոր-մշակութային մեր կյանքում: «Ոսկե ծիրան»-ն իր ուրույն տեղն ունի կինոաշխարհի բազմաթիվ փառատոնների մեջ. այն հրաշալի հնարավորություն է ընձեռում կինոարվեստի շնորհաշատ ստեղծագործողներին մասնագետների ու հանրության դատին ներկայացնելու իրենց աշխատանքի արդյունքները: Հիմնադրման օրվանից կինոփառատոնը ստանձնել է քաղաքակրթությունների ու մշակույթների երկխոսության մի բարձր առաքելություն` ծառայելով ընդհանուր բարիքի, մարդկանց ու ժողովուրդների միջև համերաշխության ու խաղաղության ամրապնդմանը. արժեքներ, որոնց ջատագովը մշտապես եղել է քրիստոնեական ավանդույթներով հարուստ մեր Հայաստան աշխարհը:
«Ոսկե ծիրան» կինոփառատոնը նշանակալի իրադարձություն է հայաստանյան մեր իրականության մեջ, որ նոր շունչ ու ազդակ է հաղորդում հայ կինոարվեստին` հարթակ դառնալով նոր ստեղծագործությունների արարման, փորձի փոխանակման, նոր կապերի ու հարաբերությունների հաստատման: Կինոփառատոնի արձանագրած ձեռքբերումներն արդյունք են փառատոնի կազմակերպիչների ու գործակիցների նվիրյալ ու հետևողական ջանքերի, Հայրենի պետության աջակցության և մասնակիցների խանդավառ ներգրավվածության:
Ուրախ ենք, որ մեր Եկեղեցին ևս իր ներդրումն է բերում «Ոսկե ծիրան» միջազգային կինոփառատոնի աշխատանքներին»:
Նորին Սրբությունը նաև անդրադարձավ ֆրանսահայ կինոռեժիսոր և դերասան Ռոբեր Կետիկյանին «Եղիցի լույս» մրցանակը հանձնելու փաստին` իր շնորհավորանքներն ու օրհնությունը բերելով մեծանուն ռեժիսորին:
«Տիար Կետիկյանը, լինելով Հայոց Ցեղասպանությունը վերապրած սերնդի շառավիղների ներկայացուցիչներից, 2015 թվականին, երբ ազգովի ոգեկոչում ենք Հայոց Ցեղասպանության 100-րդ տարելիցը, աշխարհին է ներկայացնում «Խենթ պատմություն» վերտառությամբ հեղինակային ֆիլմը, որը պատմում է Հայոց Ցեղասպանության, դրա հետևանքների և Թուրքիայի կողմից մինչ օրս տարվող ժխտողական քաղաքականության մասին: Ինչպես հեղինակն ինքն էլ նշում է, սա ոչ միայն Հայոց Ցեղասպանության 100-րդ տարելիցն է, այլև Թուրքիո պետության ժխտողականության 100-ամյակը:
Ռոբեր Կետիկյանի անցած ստեղծագործական ուղին լավագույն վկայությունն է, որ հայ ժողովրդի ստեղծագործ ոգին անհնար է ոչնչացնել. ոչ մի արհավիրք և թշնամություն չի կարող սպանել մեր ժողովրդի հոգում կյանքի հանդեպ սերը, արդարության և ազատության համար պայքարի կամքը: Նա իր օրինակով հավաստում է, որ հայ ժողովուրդը Հարությանը հավատացող ազգ է` այդ տեսիլքով ապրող և արարող», – ասաց Նորին Սրբությունը:
Ամենայն Հայոց Կաթողիկոսը նաև իր գնահատանքը բերեց կինոփառատոնի կազմակերպիչ Հարություն Խաչատրյանին` փառատոնի ստեղծման և արձանագրած հաջողությունների գործում ունեցած վերջինիս մեծ վաստակի համար:
Վերջում Հայոց Հայրապետն իր օրհնությունը փոխանցեց փառատոնի բոլոր մասնակիցներին ու մրցանակակիրներին` ի խորոց սրտի աղոթքով նորանոր հաջողություններ մաղթելով «Ոսկե ծիրան» միջազգային կինոփառատոնին:
Մայր Աթոռ Սուրբ Էջմիածին
