Այսօր «Վանաձոր-Քիմպրոմ»-ի աշխատակիցները նորից դուրս էին եկել բողոքի ցույցի: Պահանջը նույնն է` ստանալ իրենց չվճարված աշխատավարձերը:
Գործարանի աշխատակիցները հավաքվել էին Լոռու մարզպետարանի դիմաց` մարզպետ Արթուր Նալբանդյանին հանդիպելու եւ իրենց պահանջները ներկայացնելու ակնկալիքով:
Ցուցարարների հետ հանդիպեց ՀՀ Լոռու մարզպետարանի աշխատակազմի ղեկավար Աշոտ Մանուկյանը, որը նրանց հայտնեց, թե մարզպետը գտնվում է արձակուրդում եւ չի կարող հանդիպել:
Կարդացեք նաև
Ցուցարարները պահանջեցին, որ իրենց ընդունի փոխմարզպետը: Վերջինս Երեւանում խորհրդակցության գտնվելու պատճառով եւս չկարողացավ հանդիպել ցուցարարներին:
Լրագրողների հետ զրույցում «Վանաձոր-Քիմպրոմ»-ի աշխատակից Հրաչիկ Մարտիրոսյանը նշեց, որ գործարանն իրեն պարտք է շուրջ 2 միլիոն դրամ աշխատավարձ:
«2014 թ.- ի դեկտեմբերից հետո էլ աշխատավարձ չեմ ստացել: Դիմել ենք մարզպետին: Նա խոստացավ հնարավորինս օժանդակել, ընդառաջել: Իմ իմացած տվյալներով մարզպետը հարցը բարձրացրել է ՀՀ վարչապետ Հովիկ Աբրահամյանի մոտ, որը խոստացել է հարցին լուծում տալ մոտ ժամանակներս` ֆինանսական հնարավորությունների առկայության դեպքում»,-տեղեկացրեց գործարանի աշխատակիցը:
Ցուցարարները որոշեցին երկու օր անց կրկին հավաքվել մարզպետարանի դիմաց:
Մհեր ԹԱԴԵՎՈՍՅԱՆ
