ԲՀԿ-ն այցելել է կրակահերթի տակ գտնվող գյուղեր
Տավուշի մարզի սահմանամերձ համայնքների բնակիչները, որոնք կրակահերթի տակ են ապրում, դժգոհում են ոչ թե կրակոցներից, այլ կենցաղային խնդիրներից, բարձր վարկերից, խմելու ջրի բացակայությունից ու վճարովի դասագրքերից: Այսօր այս մասին Aravot.am-ի հետ զրույցում ասաց «Բարգավաճ Հայաստան» կուսակցության ղեկավար Նաիրա Զոհրաբյանը, որն այս պահին իր կուսակցական ընկերների հետ շրջում է սահմանամերձ գյուղերով:
Տիկին Զոհրաբյանն ասաց, որ այցելել են Ոսկեվան,Սեւքար, Բաղանիս, Կայարանավան գյուղեր ու հանդիպումներ ունեցել բնակիչների եւ գյուղապետերի հետ. «Մարդիկ իսկապես սահմանապահի հոգեբանությամբ են, ամեն օր կրակահերթի տակ են, բայց խուճապ չկա, նրանք պատրաստ են մինչեւ վերջ պայքարել»:
Պատգամավորը զարմացած էր, թե ինչպե՞ս է իշխանությունը թույլ տալիս, որ այս սահմանամերձ գյուղերի բնակիչներին բանկերը 24%-ով վարկ տան. «Մարդկանց վարկով վերցրած տները կրակոցներից վնասվել են: Կայարանավան համայնքի մի բնակիչ ցույց տվեց իր բնակարանը, որն ադրբեջանական կրակոցներից լուրջ վնասներ էր կրել: Սահմանամերձ գյուղերի բնակիչները դժգոհում են, որ աշակերտների դասագրքերը վճարովի են: Այստեղ 160 աշակերտ կա, մի՞թե հնարավոր չէ այս աշակերտներին անվճար տրամադրել դասագրքերը: Ես խոսեցի կրթության եւ գիտության նախարար Աշոտյանի հետ, որպեսզի այս խնդրին լուծում տրվի»,-ասաց Զոհրաբյանը:
Կարդացեք նաև
Նաիրա Զոհրաբյանն ասաց, որ գյուղ կա, որն անգամ խմելու ջուր չունի, երկու ծորակ է, այն էլ կասկածելի որակի ջուր է գալիս:
«Երեխաները սթրեսի մեջ են, նկուղներից դուրս չեն գալիս: Ես հիմա պաշտոնապես դիմում եմ առողջապահության նախարար Արմեն Մուրադյանին՝ թող բժիշկների, հոգեբանների խումբ ուղարկի սահմանամերձ համայնքներ՝ օգնելու համար»,-ասաց տիկին Զոհրաբյանը: Նրա ներկայացմամբ՝ երեխաներին այդ համայնքներից հեռացրել են, Սեւքար համայնքում այցելել են այն տունը, որտեղ ադրբեջանցիների կրակոցները պատը ծակել են ու, բարեբախտաբար, երեխաները հինգ րոպե առաջ տանից դուրս եկած են եղել:
Զոհրաբյանը նաեւ վստահեցրեց, որ իրենք օրենսդրական նախաձեռնությամբ հանդես են գալու, որպեսզի սահմանամերձ այս համայնքների բնակիչները արտահերթ կարողանան Խնայբանկի ավանդները ստանալ:
Ինչ վերաբերում է վնասված բնակարաններին, ԲՀԿ ղեկավարը վստահեցրեց, որ այս հարցն էլ պիտի կառավարությունում բարձրացնեն:
ԲՀԿ անդամ Վահե Էնֆիաջյանն էլ մեզ հետ զրույցում ասաց, որ սահմանամերձ գյուղերի բնակիչների շրջանում որեւէ խուճապ չկա, նրանց մարտական տրամադրությունը տեղում է, մարդիկ չեն կաշկանդվում, իսկ մեր զինված ուժերը համապատասխան պատասխան են տվել ադրբեջանական կողմին: «Իրենց մոտ քաղաքական բարդ իրավիճակներ են զարգանում, եւ այդ պատճառով էլ այսպիսի վիճակ են ստեղծում սահմանին»,-ասաց Էնֆիաջյանը:
Նելլի ԲԱԲԱՅԱՆ
Լուսանկարները՝ ԲՀԿ-ի:
Սուսեք ԲՀԿ-ն լուրջ գործ է անում, ախր շատ լուրջ գործի են է՜՜՜ տղեքը և կինը, սուսեք չխանգարենք:
2 օր է աբսուրդի հասնող մեկնաբանություններ եմ կարդում, որոնք քննադատում են սահման այցելելը:
Խոսալու փոխարեն՝ գեթ մեկ անգամ ինքներդ գնացեք սահման, քաջալերեք այնտեղի մարդկանց, ովքեր դրա կարիքն ունեն, մի նստեք ձեր ֆեյքերի էջերում և մի կատարեք այլոց պատվերները:
Ամոթ է…
Համակարգչի առաջ նստելով ցանկացած մարդ կարող է իրեն խիզախի տեղ դնել ու փորձել այլ անհատների դրական աշխատանքներին բացասական գնահատական տալ:
Այս անիմաստ գործողությունների փոխարեն փորձեք գոնե մեկ չնչին դրական գործ կատարել: