«Կրթական համակարգում այսօր ամենաառաջնային խնդիրներից մեկը գնահատման համակարգի ճշգրիտ ձևավորումն է,- համոզված է Մովսես Խորենացու անվան համալսարանի ռեկտոր Արթուր Աղաբաբյանը.- ուսանողը նույն գիտելիքներով կարող է մի բուհում «գերազանց» ստանալ, մյուսում՝ «լավ», երրորդում՝ «բավարար»: Կարծում եմ, որ այս հարցը պետք է վերանայվի և ճիշտ համակարգ մշակվի»:
Մյուս կողմից էլ գնալով իրեն ավելի զգացնել է տալիս արտասահմանում կրթություն ստանալու միտումը. «Ինձ մտահոգում է ոչ միայն ուսանողների, այլև առհասարակ մարդկային արտահոսքը: Տեսեք, ուղեղների արտահոսքին հաջորդեց գործարարների արտահոսքը: Գնում են այլ տեղերում իրենց գործունեությունը ծավալելու: Եվ, գիտեք, այդ մարդկանց մեղադրելը դժվար է, որովհետև ուզում են իրենց կարողություններն օգտագործել: Ուղղակի պետք է քաղաքականություն մշակել, պայմաններ ստեղծել, որ ցանկություն ունենան սեփական երկրում գործունեություն ծավալելու»,- այսօր լրագրողների հետ հանդիպման ժամանակ ասաց Ա. Աղաբաբյանը:
Դառնալով այս տարվա ընդունելության արդյունքներին՝ Մովսես Խորենացու անվան համալսարանի ռեկտորն ասաց, որ իրենց բուհն այս տարի շուրջ 150 դիմորդ է ընդունել՝ առկա և հեռակա բաժիններում. «Նախորդ տարվա համեմատ մի փոքր աճ կա, սակայն ընդունելության պիկը եղել է 2009-2010 թվականներին»:
Մասնավոր բուհ դիմելը Ա. Աղաբաբյանը պայմանավորում է հիմնականում ուսման վարձերի մատչելիությամբ:
Կարդացեք նաև
Ինչ վերաբերում է պահանջված և ոչ այնքան պահանջված մասնագիտություններին, հիմնական միտումն այստեղ անփոփոխ է մնացել: Մասնավոր բուհերում էլ են շարունակում «նորաձև» մնալ տնտեսագիտական և իրավաբանական ֆակուլտետները. «Որքան էլ զարմանալի է, ավելի քիչ են ընտրել ինֆորմատիկայի և կիրառական մաթեմատիկայի ֆակուլտետը: Պասսիվացել են նաև հումանիտար ուղղվածությամբ մասնագիտությունները»,- ասաց Ա. Աղաբաբյանը:
Սիրանուշ ՀԱՅՐԱՊԵՏՅԱՆ
