Հայաստանի գործատուների միության նախագահ Գագիկ Մակարյանը 2016 թվականի բյուջեն համարում է չափազանց զգուշավոր:
«Ամեն տարվա բյուջեն մյուսի շարունակությունն է, բյուջեով ստիպված ենք ապահովել մեր եկամուտները, ծախսերը ստիպված ենք նվազեցնել, եւ սա խոսում է այն մասին, որ կան ստորջրյա քարեր, որոնք թույլ չեն տալիս կառավարությանը լինել ճկուն»,- այսօր «Հայք» ակումբում ասաց Գագիկ Մակարյանը:
Ըստ նրա, կառավարությունը 2016 թվականի բյուջեի հարցում կաշկանդված ու զգուշավոր է, որովհետեւ ստացել է վատ ժառանգություն. «Նախկին կառավարության պետական ինստիտուցիոնալ մոտեցումները եղել են թերի ու ոչ արդյունավետ: Այն գիծը, որ սոցիալական պետություն ենք, ակնհայտ երեւում է, մեր հաջորդ տարվա բյուջեն 2,5 միլիարդի շրջանակում է գտնվում, որից 800 միլիոննն ուղղված է սոցիալական ոլորտին:
Կրթությանը հատկացված գումարը 250 միլիոնի շրջանակում է, 400 միլիոն՝ Պաշտպանական ոլորտին, ավելի քիչ առողջապահությանը, 900 միլիոնն է մնում մարզերին, դոտացիաներին, տնտեսական բաժին գոյություն չունի: Վիճակը պահող, զարգացում չապահովող բյուջե է»:
Կարդացեք նաև
2,2 տոկոս տնտեսական աճի մասին կանխատեսումներին անդրադառնալով՝ ասաց՝ այդպիսի ցուցանիշի մասին լսելիս պետք է ասենք՝ բավարար չէ. «Մեզ պետք է երկնիշ ցուցանիշ, իսկ այդ դեպքում կամ ներդրումների համար պետք է կանաչ լույս տալ կամ պետք է գնանք ինովատիվ ճանապարհով, ու աշխատուժը մեզ պետք է, բայց մեր աշխատուժը Հայաստանից գնում է: Իսկ աշխարհի երկրները գնում են ներդրումների, որովհետեւ այնտեղ կա մրցունակ աշխատուժ»:
Նա հակադարձեց նաեւ էկոնոմիկայի նախարար Կարեն Ճշմարիտյանի տեսակետը, թե քաղաքացիները մաշկի հետ կապված խնդիր ունեն, որ տնտեսական աճը իրենց մաշկի վրա չեն զգում. «Իսկ ի՞նչն է պատճառը, որ մարդկանց մաշկը կոպտացել է, որ չեն զգում, տարիների խնդիրները, սոցիալական վատ պայմաննե՞րն են կոպտացրել քաղաքացիների մաշկը»:
Արփինե ՍԻՄՈՆՅԱՆ
