Այսօր կառավարությունում ՀՀ վարչապետ Հովիկ Աբրահամյանն ու Իրանի Իսլամական Հանրապետության առաջին փոխնախագահ Էսհաղ Ջահանգիրը հանդես եկան հայտարարությամբ: Հայտարարությունը լուսաբանելու համար լրագրողներին կառավարություն էին հրավիրել ժամը 18.20-ին, մինչդեռ բազմաթիվ լրագրողներ ուղիղ մեկ ժամ սպասեցին, մինչեւ երկու երկրների բարձրաստիճան պաշտոնյանները կժամանեն մամուլի կենտրոն: 1 ժամ սպասելուց հետո Աբրահամյանն ու Ջահանգիրը միասին մոտ 10 րոպե ելույթ ունեցան ու շատ արագ հեռացան սրահից:
Լրագրողները հնարավորություն չունեցան հարցեր ուղղել պաշտոնյաններին:
Ինչ վերաբերում է Հայաստան-Իրան համագործակցությանը, ապա, Հովիկ Աբրահամյանը, կարելի է ասել՝ հայտնեց լավ լուրեր. մնում է՝ դրանք իրականություն դառնան:
Կարդացեք նաև
Վարչապետ Հովիկ Աբրահամյանն ասաց, որ իրանական կողմի հետ քննարկել են
Հայաստան-Իրան բարձրավոլտ էլեկտրահաղորդման 3-րդ գծի կառուցման աշխատանքներին։ Վարչապետը վստահեցրեց, որ այդ աշխատանքներն արդեն մեկնարկել են եւ կավարտվեն համաձայն սահմանված ժամանակացույցի՝ 2018 թվականին: Ըստ Աբրահամյանի, հստակեցվել են Մեղրիի ՀԷԿ-ի կառուցման աշխատանքների հետագա անելիքները եւ Իրանի հետ սահմանամերձ բնակավայրերի գազի բաշխման ցանցի կառուցման ծրագրերի ընթացքը:
Պարոն Աբրահամյանը հավաստիացրեց, որ անդրադարձ է եղել ճանապարհային ենթակառուցվածքներին առնչվող հարցերին՝ Հյուս-հարավ ներդրումային ծրագրին, Հայաստան-Իրան երկաթգծին. «Շոշափեցինք նաեւ Եվրասիական տնտեսական միություն-Իրան հարաբերություններին առնչվող հարցերը: ՀՀ կառավարության անունից պատրաստակամություն հայտնեցի աջակցելու ԵՏՄ-Իրան երկխոսության ձեւավորմանը եւ համագործակցման խորացմանը, մասնավորապես ԵՏՄ- Իրան ազատ առեւտրի համաձայնագրի կնքման համատեքստում»:
Մանրամասները` տեասնյութում
Իրանի Իսլամական հանրապետության նախագահի առաջին տեղակալ Էսհաղ Ջահանգիրին էլ գրեթե նույն բաներն ասաց, ինչ-որ Աբրահամյանն էր ասել: Պարոն Ջահանգիրն էլ վստահեցրեց, որ Հայաստան-Իրան բարձրավոլտ էլեկտրահաղորդման 3-րդ գծի կառուցման աշխատանքները ժամանակին կավարտվեն, Իրան-Հայաստան երկաթգծի կառուցման, ԵՏՄ –ի հետ կապված հարցերն են քննարկել. «Տարածաշրջանային մյուս երկրների հետ համագործակցության շրջանակում կկարողանանք Պարսից ծոցը միացնել Սեւի ծովի ճանապարհներին»: Իրանի փոխնախագահը վստահեցրեց, որ որեւէ սահմանափակում չկա Իրան-Հայաստան հարաբերությունների զարգացմանը, Իրանի տնտեսական հաջողությունները նոր եւ դրական պայմաններ են ստեղծում երկու երկրների հարաբերությունների զարգացման համար:
Հիշեցնենք, որ ՀՀ վարչապետ Հովիկ Աբրահամյանի հրավերով է Իրանի Իսլամական Հանրապետության նախագահի առաջին տեղակալ Էսհաղ Ջահանգիրը այցելել Հայաստան:
Նելլի ԲԱԲԱՅԱՆ
