Գյումրու ՀԱԿ կառույցի ներկայացուցիչ Վահագն Խաչատրյանն այսօր Aravot.am-ին դժգոհեց, որ Գյումրու բանկերում, բացառությամբ «ԱԿԲԱ կրեդիտ ագրիկոլ բանկ»-ի հրաժարվում են գումար վերցնել «Ոչ»-ի քարոզարշավի հիմնադրամի հաշվեհամարին:
«Ես այսօր ուզում էի փող փոխանցել «Ոչ»-ի քարոզարշավի հիմնադրամին, «ՎՏԲ» բանկում ասացին՝ չենք կարող գումարը վերցնել, որովհետեւ այդ հաշվեհամարը ցույց չի տալիս: Մյուս բանկերում եւս նույն պատկերն էր, ցույց չէր տալիս հաշվեհամարը ու վերջ…Միակ բանկը «ԱԿԲԱ»-ն է եղել, որտեղ կարողացել ենք փող փոխանցել, իսկ «Հայէկոնոմբանկում» մուծում կարողացա կատարել միայն ահազանգելուց հետո: Երբ ահազանգեցի, նոր ընդունեցին իմ գումարը տվյալ հաշվեհամարին:
Բանկի աշխատողներն արդարանում էին՝ ասելով, թե չմտածեք մենք խոչընդոտում ենք, ուղղակի այդ հաշվեհամարը համակարգում ցույց չի տալիս: Թե ինչի համար են այդպես անում, հետեւությունները թողնում եմ ձեզ, այս մարդիկ վախենում են, շատ լավ հասկանում են ինչ բան է «Ոչ»-ը, ինչ է «Այո»-ն: Ուզում են «Այո»-ն առաջ տանել, որովհետեւ այստեղ շահեր կան: Շիրակի մարզպետն ու Գյումրու քաղաքապետը շատ լավ գիտեն, որ եթե հանկարծ չկարողանան Գյումրիում ապահովել «Այո-ի թվերը, իրենք կարող է մտնել գործազուրկների շարքերը: Այս պաշտոնյաները քննություն են հանձնում Սերժ Սարգսյանի մոտ», -ասաց Վահագն Խաչատրյանը:
Նունե ԱՐԵՎՇԱՏՅԱՆ
