«Հանձնաժողովի կողմից իրականացված մշտադիտարկումների համաձայն՝ ՀՀ սահմանադրական փոփոխությունների հանրաքվեի նախապատրաստման քարոզարշավը լուսաբանել են 35 հեռուստառադիոընկերություններ՝ 24 հեռուստաընկերություն եւ 11 ռադիո ընկերություն»,- դեկտեմբերի 6-ին լրագրողների հետ հանդիպման ընթացքում ասաց Հայաստանի Հանրապետության հեռուստատեսության եւ ռադիոյի ազգային հանձնաժողովի նախագահ Գագիկ Բունիաթյանը:
Նա նշեց, որ այս պահին ՀՌԱՀ-ը շարունակում է մշտադիտարկումը, որը կավարտվի այսօր ժամը 20:00-ին:
ՀՌԱՀ անդամ Արմեն Մկրտչյանն ասաց, որ հանձնաժողովը իրականացրել է 59 հեռուստառադիոընկերությունների եթերի մշտադիտարկում, որից 39 հեռուստաընկերություններ են, իսկ 20-ը՝ ռադիոընկերություն:
Կարդացեք նաև
«Հեռուստաընկերությունների եթեր 1 րոպեի նվազագույն սակագինը կազմում է 1400 դրամ, իսկ առավելագույնը՝ 120 հազար դրամ: Ռադիոընկերությունների եթերի 1 րոպեի նվազագույն սակագինը կազմել է 480 դրամ, իսկ առավելագույնը՝ 3600 դրամ: Այդ տվյալները համապատասխանել են օրենսդրության պահանջներին եւ ներկայացված են եղել օրենքով սահմանված ժամանակահատվածում Կենտրոնական ընտրական հանձնաժողովի կայքէջում»,- ասաց Արմեն Մկրտչյանը:
Նա նշեց, որ ՀՌԱՀ-ի մշտադիտարկման արդյունքում արձանագրվել են ՀՀ սահմանադրության փոփոխությունների հանրաքվեի քարոզչության մասնակցող կողմերի վերգետնյա եթերային հեռարձակում իրականացնող հեռուստաընկերությունների, ռադիոընկերությունների կողմից հոկտեմբերի 10-ից մինչեւ դեկտեմբերի 4-ը տրամադրված ժամանակահատվածի ցուցանիշները. «Քարոզչություն կատարող կողմերի անվճար կարգով օգտագործել են 1618 րոպե, այսինքն՝ 27 ժամ: Քարոզչություն կատարող կողմերը վճարովի կարգով վճարովի օգտագործել են 1601 րոպե, այսինքն՝ 26.5 ժամ: Հեռուստառադիոընկերությունների լրատվական թողարկումներում քարոզչություն կատարող կողմերի լուսաբանման ընդհանուր տեւողությունը կազմել է 13 349 րոպե, որը կազմում է 222 ժամ: Հեռուստառադիոընկերությունների այլ հաղորդումներում քարոզչություն իրականացնող կողմերի մասնակցությամբ ընդհանուր տեւողությունը կազմել է 47 301 րոպե, այսինքն՝ 788 ժամ»:
Նա հավելեց, որ ՀՀ սահմանադրության փոփոխությունների հանրաքվեի քարոզչության մասնակցող կողմերի վերգետնյա եթերային հեռարձակում իրականացնող հեռուստաընկերությունների, ռադիոընկերությունների կողմից տրամադրված ընդհանուր եթերաժամանակը կազմում է 63 871 րոպե, այսինքն՝ 1064 ժամ՝ 44 օրից ավել եթեր:
Ամի ՉԻՉԱԿՅԱՆ
