Լուսանկարիչ Գերման Ավագյանն այսօր «Նավարար»-ում ներկայացրեց իր «Դիմակ» նախագիծը, որը ներառում է 150-ից ավելի լուսանկար: Բոլորը ցուցադրված չեն, բայց Ավագյանը յուրօրինակ մոտեցմամբ է պատրաստել նախագիծը՝ լուսանկարելով տարբեր մասնագիտությունների տեր անձանց՝ իր իսկ «դիմակը» ձեռքին:
«Գաղափարը վաղուց է ծագել, բայց չէի կարողանում այնպիսի մեկին գտնել, որը կպատրաստեր իմ դիմակը: 2005թ.-ին այդպիսի դիմակ պատրատվեց՝ ՁԻԱՀ-ով հիվանդ մարդկանց հարցազրույցների գրքի համար: Քանի որ նրանց դեմքը չպետք է երեւար, ես իմ «դեմքը» տվեցի նրանց եւ լուսանկարվեցին իմ դիմակով: Այն անհաջող էր ստացվել, որովհետեւ նմանությունը քիչ էր»,-Aravot.am-ի հետ զրույցում ասաց Գերման Ավագյանը:
Շարունակելով պատմությունը՝ նա նշեց, որ վերջապես գտել է համապատասխան արվեստագետի. ԱՄՆ-ից ժամանած Սահակ Պողոսյանն էլ պատրաստել է Ավագյանի դիմակը: «Սկզբում մտածում էի՝ բոլորը դիմակով փակեն դեմքը եւ մերկ նկարվեն, բայց հետո հասկացա, որ չի ստացվի, որովհետեւ ոչ մեկ այդ քայլին չի գնա: Այդ պատճառով էլ որոշեցի ընկերներիս լուսանկարել: Նրանց տվեցի իմ դիմակը եւ ասացի՝ ինչ ուզում եք՝ արեք: Արդյունքում, լուսանկարներում բոլորն ինչ-որ վերաբերմունք են ցույց տալիս դիմակին: Շուշան Պետրոսյանն, օրինակ, տեսեք՝ ինչ է անում իմ քաչալ գլխի հետ, բայց դա կապ չունի կյանքի հետ»,- ցույց տալով ԱԺ պատգամավորի լուսանկարը՝ ասաց Գերման Ավագյանը:
Կարդացեք նաև
Հեղինակը տեղեկացրեց, որ նախագիծը շարունակական է:
Հավելենք, որ հեղինակի նախորդ՝ «Տեսողական պոեզիա» նախագիծը համադրում է լուսանկարչությունն ու պոեզիան:
Լուիզա ՍՈՒՔԻԱՍՅԱՆ