«ՀՅԴ-ն գնալով կորցնում է իր վարկանիշը: ՀՅԴ-ն չկարողացավ ոչ նախորդ կոալիցիաներում իր աշխարհայացքային խնդիրն անցկացնել, իր ընտրողների թիվն էլ գնալով նվազեց: ՀՅԴ-ից բավականին արտահոսք եղավ, չկարողացավ պատշաճ բացատրել իր գործողությունները: ՀՅԴ-ն շատ վայրենի տարբերակներում լռեց, չանդրադարձավ հանրային կարեւորագույն երեւույթներին: Ես այս բոլորը շատ ցավով եմ ասում, որովհետեւ իսկապես փորձառու կուսակցություն էր, որը ձեռք էր բերել ե՛ւ կուսակցական փորձ, ե՛ւ ծրագրի հետեւողականություն: Բայց սրանք մաշվեցին Հայաստանում տարբեր ձեւերով՝ ՀՀԿ-ի հետ սիրալիր-մերժողական հարաբերություններում անորոշ լուծումներ փնտրելով»,- Aravot.am-ի հետ զրույցում այսպիսի տեսակետ հայտնեց ազգագրագետ Հրանուշ Խառատյանը՝ ՀՅԴ-ՀՀԿ հնարավոր կոալիցիայի հետ կապված:
Ըստ նրա, ՀՅԴ-ի մեջ էլ եղան այնպիսի դեպքեր, երբ սուտ խոսքերով փորձեցին փաստերը հերքել, ինչպես ՀՀԿ-ում. «Այս ամենը, ցավոք, նվազեցրին նրա վարկանիշը: Դաշնակցությունը շատ կարեւոր տեղերում լռեց: Թերեւս լռեց, որովհետեւ շանսեր կամ հույսեր ուներ հետ բերելու իշխանության միջոցով իր դիրքերը ամրապնդելը: Ես հիմա հստակ տեսնում եմ, որ ՀՅԴ-ն առաջիկա ընտրություններում, որպես կուսակցություն, հանրային վարկանիշի իր այս մակարդակում որեւէ շանս չունի: Սրա համար ինքը գնում է այսպիսի՝ իմ կարծիքով ամոթալի դաշինքի՝ հույս ունենալով, որ ինքը իշխանության օգնությամբ պետք է փոքր իշխանության սեգմենտը, որն ունի, պահպանի: Ինքն իր տեղում բավական դրական դեր էր խաղում, իսկ այս պարագայում դա չի լինելու»:
Մենք ճշտեցինք՝ այսինքն, ՀՅԴ-ն պարզ առեւտրի՞ է գնացել իշխանության հետ՝ Հրանուշ Խառատյանը հաստատեց. «Ես այդպես եմ կարծում: ՀՅԴ-ն նաեւ սփյուռքին բացատրելու խնդիր ունի, թե ինչու է այդքան նվազում իր հնարավորությունները, իր կարողությունները: Իրենք անընդհատ խոսում են, որ իրենք միակն են, էս են, էն են, դա շարունակվում է, մինչդեռ իրենց վարկանիշը գնալով շարունակում է իջնել»:
Հռիփսիմե ՋԵԲԵՋՅԱՆ
Եթե տիկին Խառատյանի ասածով է, ապա ՀՀԿ-ի ինչի՞ն է նման կոալիցիան։ ՀՅԴ-ն իրականում ավելին է, քան պատկերացում ունի բանախոսը և ընդհանրապես Հայաստանի հանրության մեծ մասը…
Այն զուտ կուսակցություն չէ, ավելի շուտ վերպետական կառույց է աշխարհասփյուռ հայության շրջանում…
Գուցե՞ Սերժ Սարգսյանը հասկացել է դա…
Իսկ ե՞րբ սա կհասկանա Հայաստանի հանրությունը, այ էն ժամանակ…