ԱՄՆ նախագահ Բարաք Օբաման Կոնգրեսին է ուղարկել 2017թ. ֆիսկալ տարվա բյուջեի նախագիծը, որում առաջարկվում է 22,4 մլն դոլար հատկացնել Հայաստանի տնտեսական զարգացման համար: Այս մասին ասվում է Ամերիկայի հայկական համագումարի տարածած հաղորդագրության մեջ:
ԱՄՆ պետքարտուղարության պաշտոնյաների հետ վերջին հանդիպմանը Համագումարի առաջնորդները հերթական անգամ առաջ են քաշել իրենց մտահոգությունները՝ կապված Ադրբեջանի կողմից շարունակվող հրադադարի խախտման դեպքերի, ինչպես նաև Թուրքիայի և Ադրբեջանի կողմից շարունակվող շրջափակման հետ: Համագումարը նաև բարձրացրել է Մերձավոր Արևելքում քրիստոնյաների բարեկեցության և ապահովության հարցը:
2017թ. ֆիսկալ տարվա բյուջեով նախատեսվում է 22,4 մլն դոլար տրամադրել Հայաստանի տնտեսական զարգացման համար, ինչը գերազանցում է 2016թ. համար նախատեսված գումարը: Նախագահի առաջարկած բյուջեի նախագծով պահպանվում է ռազմական հավասարակշռությունը Հայաստանի և Ադրբեջանի միջև. 1 մլն դոլար՝ Օտարերկրյա ռազմական ֆինանսավորման և 600 հազար դոլար Միջազգային ռազմական կրթության և ուսումնառության համար (նախորդ տարվա համեմատությամբ գումարի չափը նվազել է): Բացի այդ, բյուջեի նախագիծն աջակցություն է հայտնում Ազատության աջակցության ակտի 907-րդ մասին, որը սահմանափակում է Ադրբեջանին տրամադրվող աջակցությունը, քանի դեռ նա շարունակում է թշնամական գործողությունները Հայաստանի նկատմամբ:
Նախագահի աշխատակազմը նաև առաջարկել է մոտ 3 մլրդ դոլար տրամադրել միգրացիայի դեմ պայքարի և փախստականների աջակցության համար:
Կարդացեք նաև
Հայաստանը, նախատեսվում է, որ ֆինանսավորում կստանա նաև Վերականգնվող էներգիայի ընդլայնման ծրագրի (SREP) շրջանակում: SREP-ի ներդրումների ընդհանուր գումարը, ըստ բյուջեի նախագծի, կկազմի 604 մլն դոլար, որը կուղղվի 18 երկրների, այդ թվում Հայաստանին:
Պատրաստեց՝ Վիկտորյա ԱՆԴՐԵԱՍՅԱՆԸ
