Հայոց Տոնացույցի համաձայն Մեծ Պահքի 24-րդ օրը Միջինք է, որով կիսվում է Աղուհացի շրջանը: Թեպետ օրվա առթիվ բացառիկ եկեղեցական արարողություններ չկան, բայց այնուամենայնիվ, այն ամեն տարի յուրահատուկ կերպով է նշվում Հոլիվուդի Ս. Հովհաննու Կարապետ եկեղեցում: Այս տարին ևս բացառություն չէր:
Մարտի 2-ին, չորեքշաբթի, երեկոյան 6.30-ին, տեղի ունեցավ Հանգստյան ու Խաղաղական հանդիսավոր ժամերգություններ՝ գլխավորությամբ Հարավային Ամերիկայի Արևմտյան թեմի բարեխնամ առաջնորդ, գերաշնորհ Տ. Հովնան արք. Տերտերյանի: Մթնշաղին կատարվող հսկման ընթացքում եկեղեցու հավատացյալներն ունեցան աղոթելու, խոկալու հրաշալի առիթ, որն ավելի ջերմացավ Սրբազան հոր ներշնչող ու խրատական հոգևոր պատգամով: Ժամասացության ավարտին, առաքելական սովորության համաձայն, շուրջ 200 հավատացյալները, սիրո ընթրիքի հավաքվեցին եկեղեցու «Տաղլյան» մշակութային կենտրոնում: Եկեղեցու բարեխրատ հովիվ, արժանապատիվ Տ. Մանուկ ավագ քահանա Մարգարյանն ու Հոգաբարձուների Խորհրդը ներկաների համար պատրաստել էին գեղեցիկ անակնակալ՝ երեկոն համեմելով գեղարվեստական հայտագրով:
Հանդիսության սկզբում Լաուրա Մակվեցյանը ներկայացրեց Միջինքի ազգային սովորությունները, ապա հայտնի դերասան ու ասմունքող Հարություն Ֆոդուլյանը երեկոն օժտեց չարենցյան շնչով: Չափազանց ազդեցիկ էր ծրագրի վերջին մասը, ուր ժողովրդական երգերի կատարումներով հանդես եկավ Գևորգ Չաքմանյանը:
Կարդացեք նաև
Նմանօրինակ հոգեմտավոր ձեռնարկները՝ լի մշակութային ու անանց արժեքներով, ուժ են հաղորդում Մեծ Պահքի ճանապարհորդներին՝ դառնալով դեղ ու դարման հայենակարոտ ու ասվածասեր սրտերի համար:
Օրը վերջացավ Հովնան սրբազանի «Պահպանիչ» աղոթքով ու ջերմ բարեմաղթանքներով:
Հովհաննես սարկավագ Գումրույան
