Դիլիջանում երկօրյա սեմինար՝ դատավորների համար
2016 թվականի մարտի 19-20-ը Դիլիջան քաղաքի «Դիլիջան Ռեզորթ» հյուրանոցում տեղի ունեցավ երկօրյա սեմինար-քննարկում՝ ՀՀ վճռաբեկ դատարանի 2014-2015 թվականների նախադեպային իրավունքի վերաբերյալ, որին մասնակցում էին ՀՀ վճռաբեկ դատարանի քրեական պալատի դատավորները, առաջին ատյանի ընդհանուր իրավասության դատարանների դատավորները, օգնականները, ԵԱՀԿ երեւանյան գրասենյակի իրավական հարցերով խորհրդատու Մարիա Սիլվանյանը: Սեմինարը կազմակերպել էր ՀՀ դատական դեպարտամենտը՝ ԵԱՀԿ երեւանյան գրասենյակի աջակցությամբ:
ԵԱՀԿ երեւանյան գրասենյակի իրավական հարցերով խորհրդատու Մարիա Սիլվանյանը մատնանշեց, որ ԵԱՀԿ երեւանյան գրասենյակն աջակցում է ընթացիկ դատաիրավական բարեփոխումներին: Նա հույս հայտնեց, որ ԵԱՀԿ-ի եւ ՀՀ վճռաբեկ դատարանի համատեղ ջանքերը կնպաստեն արդարադատության կանխատեսելիության եւ իրավունքի գերակայության ամրապնդմանը:
Ողջունելով ներկաներին՝ ՀՀ վճռաբեկ դատարանի քրեական պալատի նախագահ Դավիթ Ավետիսյանը նշեց, որ մեր վերլուծությունները ցույց են տալիս, որ պալատի որոշումները հսկայական ազդեցություն ունեն ոչ միայն դատական պրակտիկայի, այլեւ ողջ քրեական արդարադատության գործընթացների վրա: Այդ առումով դատավորների իմացությունը կարեւորվում է: Այդ նպատակով ԵԱՀԿ աջակցությամբ դատավորների համար կազմակերպվում է սեմինարների շարք, որը նպատակ ունի առաջին ատյանի դատավորներին ծանոթացնել Վճռաբեկ դատարանի կողմից ձեւավորվող նախադեպային իրավունքի վերջին զարգացումներին:
ՀՀ վճռաբեկ դատարանի նախագահի խորհրդական Արմեն Հովհաննիսյանը, Վճռաբեկ դատարանի քրեական պալատի օգնականներ Ժենյա Ստեփանյանը, Տաթեւիկ Սուջյանը եւ ավագ օգնական Անի Դանիելյանը ներկայացրին ՀՀ վճռաբեկ դատարանի 2014-2015 թվականների նախադեպային առանձին որոշումներ, որոնք հիմնարար նշանակություն կարող են ունենալ իրավակիրառական պրակտիկայի համար:
ԱՄԱԼՅԱ ՀԱՐՈՒԹՅՈՒՆՅԱՆ
Կարդացեք նաև
«Առավոտ» օրաթերթ
24.03.2016
