«Նոր Հայաստան» հանրային փրկության ճակատը երեկ հանդես եկավ հայտարարությամբ` մատնանշելով, որ ստեղծված իրավիճակում միաբանություն է անհրաժեշտ: «Մենք մեր առջեւ խնդիր ենք դրել հասկանալ, թե ինչու Սերժ Սարգսյանը չի անում ակնհայտ անհրաժեշտ քայլը, այն է` ԼՂՀ-ի անկախության ճանաչումը, ինչը սպասելի է եւ տրամաբանական: Նման քրեական ռեժիմները միջազգային հանրության լայն աջակցությունը չեն կարող ունենալ»,-այսօր «Հայացք» մամուլի ակումբում, անդրադառնալով հայտարարությանը, ասաց «Նոր Հայաստան»-ի քաղաքական խորհրդի անդամ Անդրիաս Ղուկասյանը:
Նա տեղեկացրեց, որ հաշվի առնելով Ադրբեջանի նախահարձակ գործողությունների հետեւանքով ստեղծված իրավիճակը` «Նոր Հայաստան»-ն առաջիկայում ցույցեր եւ բողոքի ակցիաներ չի կազմակերպի. «Ընդդիմադիր ուժերը զերծ են մնում բողոքի ակցիաներ անցկացնելուց եւ ներքին քաղաքական դաշտում հարցեր ու խնդիրներ բարձրաձայնելուց, բայց պատասխանատվությունը մնում է իշխանության ուսերին: Մեր առաջիկա քայլերն են` պահանջել, որպեսզի քաղբանտարկյալներն ազատվեն, իսկ ոչ ծանր հանցագործություն կատարած մարդկանց նկատմամբ համաներում կիրառվի: Սրանք առաջարկներ են իշխանությանը»:
Ղուկասյանն անդրադարձավ նաեւ նախագահ Սերժ Սարգսյանի` Ազգային անվտանգության խորհրդի նիստում հնչած` Լեռնային Ղարաբաղի հետ ռազմական փոխօգնության պայմանագիր կնքելու առաջարկին, ասելով. «Դա ավելի թույլ լուծում է, քան ՀՀ-ի կողմից ԼՂՀ անկախության ճանաչումը: Բանն այն է, որ նման առաջարկին միջազգային հանրությունը չի կարող աջակցել: Իսկ ճանաչման դեպքում միջազգային հանրությունը կարող է աջակցել` միանալով ճանաչման գործընթացին»:
Լուիզա ՍՈՒՔԻԱՍՅԱՆ