ԱԺ պատգամավոր, վերակազմյալ ՍԴՀԿ ատենապետ Լյուդմիլա Սարգսյանն այսօր «Հայացք» մամուլի ակումբում հանդես եկավ հայտարարությամբ, որով նախատեսում է կին կամավորների հավաքագրել:
«Հայ ժողովուրդը ցույց տվեց, որ միասնական է եւ կարող է ապահովել բանակի թիկունքը: Իշխանությունը եւ ընդդիմությունը պետք է մի կողմ դնեն իրենց տարաձայնությունները եւ լծվեն հայրենիքը պաշտպանելու նվիրական գործին: Այստեղ շատ կարեւոր է հայ կնոջ դերը: Որպես կին քաղաքական գործիչ, ես գիտակցում եմ նաեւ իմ պատասխանատվությունը հայրենիքի հանդեպ: Ուստի պատրաստ եմ նախաձեռնել կանանց կամավորական ջոկատների կազմակերպումը: Անդամագրված կանայք նախնական զինվորական պատրաստություն անցնելուց հետո կմեկնեն ռազմի դաշտ եւ կաջակցեն մեր հերոս զինվորներին` զբաղվելով թե բուն ռազմական գործողություններով, թե թիկունքի ապահովմամբ»,- հայտարարեց նա:
Տիկին Սարգսյանը տեղեկացրեց, որ արդեն առաջարկը գրավոր տեսքով ուղարկել է ՀՀ Պաշտպանության նախարարությանը, որի համաձայնությունը ստանալուց հետո կհրապարակի կանանց կամավորական ջոկատների ստեղծման նախաձեռնության կազմակերպչական մանրամասները:
Պատգամավորը համոզված է, որ շատ հայ կանայք կմիանան նախաձեռնությանը. «Միայն իմ ջանքերը շատ քիչ են, որպեսզի կարողանանք իրականացնել այս կարեւոր ծրագիրը, ուստի միանալու կոչ եմ անում կին քաղաքական գործիչներին: Մենք կասկածի տակ չենք դնում մեր զինվորի քաջությունը: Մեր բանակը տարածաշրջանի ամենահզոր բանակն է, բայց վերջին օրերը ցույց տվեցին, որ այսպիսի նախաձեռնության անհրաժեշտությունը կա: Աղջիկներին պետք է զինվորական պատրաստվածության դասընթացներում ներգրավել: Մենք մարտունակ ենք, բայց պարտավոր ենք ավելի ուժեղ լինել, քաղաքացին էլ` կին, թե տղամարդ, պետք է գիտակցի, որ այս երկրի զավակն է եւ պարտավորություն ունի երկրի հանդեպ»:
Կարդացեք նաև
Լյուդմիլա Սարգսյանի խոսքով` նախաձեռնությունը կանանց շրջանում խուճապ չի առաջացնի. «Գիտեմ բազմաթիվ կանանց, այդ թվում` դստերս, որոնք պատրաստ են իրենց ծառայությունը մատուցելու մեր երկրին: Ես չափից դուրս լավ կարծիք ունեմ հայ կնոջ մասին. հիշեք Սոսեին, Փառանձեմին, Զարմանդին…»:
Պատգամավորը նաեւ վկայակոչեց Իսրայելին, որը տարիներ շարունակ հակամարտության մեջ է Պաղեստինի հետ: «Իսրայելում չկա մի քաղաքացի, որը նախնական զինվորական պատրաստություն անցած չլինի»,-ասաց նա:
Հիշեցնենք`Aravot.am-ի հետ զրույցում ԱԺ ՀՀԿ խմբակցության պատգամավոր Շուշան Պետրոսյանն ասել է, որ իրեն եւս շատ կանայք են դիմում, որպեսզի անդամագրվեն՝ առաջնագիծ գնալու համար:
Լուիզա ՍՈՒՔԻԱՍՅԱՆ